Ndonga beyindulanga vo Mbangi za Yave nkumbu a dibundu diampa. Kansi, se vioka mvu 2.700, selo ya Nzambi mosi kaka aludi bayikilwanga vo “mbangi” zandi. (Yesaya 43:​10-​12) Yamuna mvu a 1931, twayikilwanga vo Alongoki a Nkand’a Nzambi. Ekuma twayantika yikilwa vo Mbangi za Yave?

Nzambi eto tusunzulanga. E nkumbu a Nzambi, Yave, nkumbu miayingi yasonama muna sono yankulu ya Nkand’a Nzambi. Muna nsekola zayingi za Bibila, e nkumbu a Nzambi yakatulwa yo vingiswa mazina nze e Mfumu yovo Nzambi. Kansi, Nzambi aludi wasengomona e nkumbu andi kwa Mose mu vova vo: “Eyayi i nkumbu ame yamu mvu ya mvu.” (Luvaiku 3:​15) Muna mpila yayi, Yave wakiswaswanesa ye nzambi zawonso zaluvunu. Tuna ye kiese kia yikilwa muna nkumbu avelela ya Nzambi.

E nkumbu Mbangi za Yave salu kieto iyikanga. Kuna nz’ankulu, akwa unsongi tuka muna Abele, basilanga umbangi mu kuma kia lukwikilu lwau muna Yave. Muna tandu yalanda, Noa, Abarayama, Sara, Mose, Davidi kumosi mpe ye selo yakaka, bayikama e ‘tuti dia mbangi’ zazi. (Ayibere 11:4–12:⁠1) Nze una muntu kesilanga kimbangi kuna mbazi a nkanu muna tanina ona okondelo e kuma, yeto Mbangi za Yave twakubama mu samuna e ludi mu kuma kia Nzambi eto.

Yesu tutangininanga. Nkand’a Nzambi uyikilanga Yesu vo “mbangi akwikizi ye ludi.” (Lusengomono 3:​14) Yesu yandi kibeni wavova vo ‘yasengomona nkumbu a Nzambi’ yo ‘sila ludi’ mu kuma kia Nzambi “umbangi.” ( Yoane 17:26; 18:​37) Alandi akieleka a Kristu bafwete sila e nkumbu a Yave umbangi yo zayisa yo kwa akaka. Mbangi za Yave i diau bevanganga.

• Ekuma Alongoki a Nkand’a Nzambi bayantika yikilwa vo Mbangi za Yave?

• Nkia ntangwa o Yave kayantika kala ye mbangi ova ntoto?

• Nani i Mbangi a Yave osundidi?