Bantu baanji balayeeya ayi Bakamboni Bakwe Yehova ndiina lya bupailishi bwaconoono. Nacibi boobo myaaka iinda 2,700 yakwisule, basebenshi bakwe Lesa walushinisho bakalinga kwiitwa ayi “Bakamboni.” (Isaya 43:10-12) Katutana kushika mu 1931 twakalinga kwiitwa ayi Bashikwiiya Baibo. Ino ngumulandunshi ngotwakasalila kwiitwa ayi Bakamboni Bakwe Yehova?

Liina ili lilalengesha Lesa wesu kushibikwa. Kweelana amabuku akale kale, liina lyakwe Lesa, Yehova, lilacanika mankanda aanji muBaibo. MumaBaibo aanji liina ili bakalikusha akusebensesha maswi abulemu mbuli Mwaami na Lesa. Nacibi boobo, Lesa wancinencine wakalwiita Mose liina lyakwe mwiine, lya Yehova, akwaamba ayi: “Ili ndyeliina lyangu lyoonsebo.” (Kulonga 3:15) Munshila iyi wakatondesha ayi ulipusene abalesa bakubeca boonse. Tulikondetwe kwiitwa liina lyakwe Lesa lisalalite.

Liina ili lilasansulula ncito yesu. Kutalikila kuli Abelo musankwa ululeme, bantu baanji bakale kale bakatondesha ayi bakalinga kushoma Yehova. Kuswabo kumyaaka yakale kale yoonse, Nowa, Abulaamu, Saala, Mose, Defedi, alimwi abamwi, bakalinga ndubasu lwa “bakamboni baanji.” (Bene Ebulu 11:4–12:1) Bweenka muntu mbweenga wemikaninaako muntu ngobabekesha mulandu mukooti, aswebo tulishinishite kushibisha cancinencine cakwe Lesa.

Tulakonkela Yesu. Baibo ilamwiita ayi “kamboni ushomeka alimwi wancinencine.” (Ciyubululo 3:14) Yesu mwiine wakaamba ayi, ‘wakashibisha bamwi liina lyakwe Lesa’ alimwi ‘akusansulula lushinisho’ lwakwe Lesa. (Joni 17:26; 18:37, NWT) Aboobo bashikwiiya bakwe Klistu bancine, balyeelete kwiitwa aliina lyakwe Yehova akulishibisha kubamwi. Ishi Bakamboni Bakwe Yehova nshebatokwelesha cankusu kucita.

• Ino nceebonshi Bashikwiiya Baibo ncobakasalila liina lya Bakamboni Bakwe Yehova?

• Ino Yehova wakatalika lili kuba a Bakamboni pacishi?

• Ino Kamboni munene wakwe Yehova ngaani?