’Ba kakau eyi ega kini ’Ba Yehova ma E’yo Eti Nzepi ’Diyi dini efupi o’di ni. Isu de eli alipi 2,700 drio ’dale, ’ba ndra ati’bo Mungu alu adari inzipi ’diyi omve “’ba e’yo erini ma eti nzepi ’diyi.” (Isaya 43:10-12) Te kpere eli 1931 si, ’ba niki ndra ama ’Ba Biblia Onipi ’Diyi ru. Asisile di amani ama omvezu ’Ba Yehova ma E’yo Eti Nzepi ’Diyi ru ri ngoni ya?

Ru ’diri Mungu amani ri e’da. E’yo siza ndra okpolo drio ’bani si dri si ri ma alea, Mungu ma ru Yehova i ri e’da Biblia ma alea pale alifu alifu. Biblia ’bani oja ti ndundu si ’diyi ma alea, ’ba nze ru ’diri ra parinia ’baki lu Opi kaniku Mungu. Isu deresi Mungu adaru ri lu ima ngulupi ma ru Yehova i ri Musa ni ra, ani ’yo kini: “Ru mani ’dani ’daniri eri ’di’i.” (Efuza 3:15) Erini ’yezu ’dini risi, co ima esele mungu inzoru ’diyi be ndu. Ama o’a ayikosi ’bani ama omvezu ru Munguni alatararu ’disi risi.

Ru amaniri azi amani ngari e’da. Ewu ndra drio ri ma alea, ’ba kakau e’dozu agu alatararu Habili si ’diyi nzeki e’yo eti a’ita eyini Yehova ma dria ri ma e’yosi ra. Eli turu turu alipi ’diyi ma alea, Noa, Ibrahimu, Sara, Musa, azini ’ba kakau ’diyi ecaki di “’ba e’yo eti nzepi ongulumu karakarau” ’diyi ru. (Ba Ebraniani 11:4–12:1) Ekile agu azi ni pa sozu duani ma drilea e’yo eti nzezu ’ba azi e’yo koko ni ma dria rile, ama pa so okporu e’yo adaru ri nzezu Mungu ma dria.

Ama Yesu ma vuti obi. Biblia omve eri ojio “e’yo eti nzepi kililiru azini adaru” ri i. (E’yo Eceza 3:14) Yesu ma ngulupi ’yo kini i ‘ece Mungu ma ru’ ra azini kini i ‘nze e’yo adaru ri ma eti’ Mungu ma dria. (Yohana 17:6; 18:37) Ani e’yo ’disi, ’ba Kristo ma vuti bipi adaru ’diyi ki eyi ma ngulupi omve ru Yehovani risi, azini eyi ru nde ri olu ’ba azi ’diyi ni. ’Diri bani di afa ’Ba Yehova ma E’yo Eti Nzepi ’Diyi pini ’ye asi driasi ri.

• ’Ba Biblia Onipi ’diyi ojaki ru eyini ri ’Ba Yehova ma E’yo Eti Nzepi ’Diyi ru ’dini a’du ma e’yo si ya?

• Yehova ebi ovu ’ba e’yo erini ma eti nzepi ’diyi be eli si ya?

• Agu E’yo Yehova ni ma Eti Nzepi aga ’ba dria ra ri a’di i ya?