Elõñ armej rej l̦õmn̦ak bwe ãt in Ri Kõnnaan ro an Jeova ej etan juon kabuñ ekããl. Ejjab jim̦we men in. Etke? Kõnke elõñl̦o̦k jãn 2,700 iiõ ko remootl̦o̦k, Baibõl̦ eo ear ba bwe ro me rej jerbal ñan Anij eo em̦ool rej “ri kõnnaan” ro an. (Aiseia 43:10-12) Ilo kar jinoin, kar ãt eo etam ej Ri Katak Baibõl̦ Ro. Bõtab ilo kar iiõ eo 1931, kõmar ukote im bõk ãt eo Ri Kõnnaan ro an Jeova. Etke?

Ãt in ej kwal̦o̦k wõn Anij eo am. Ãt eo etan Anij, Jeova, ear wal̦o̦k ilo Baibõl̦ ko jinoin elõñ to̦ujin alen. Rainin, elõñ ukok in Baibõl̦ ko rar jol̦o̦ke ãt in im kõjerbale naan kein ãinwõt Irooj ak Anij. Bõtab, Anij eo em̦ool ear make kwal̦o̦k ñan Moses bwe etan ej Jeova. Ear ba: “Eñin Eta ñan indeeo.” (Exodus 3:15) Ilo wãween in, Jeova ear kalikkar bwe eoktak jãn anij ko jet reriab. Kõmij m̦õn̦õn̦õ bwe ãt eo ekwõjarjar etan Anij ej alikkar ilo etan kabuñ in am.

Ãt in ej kwal̦o̦k kõn jerbal eo am. Jãn kar iien ko etto, jino jãn kar Ebel, elõñ armej ro rar kwal̦o̦k kõn aer tõmak ilo Jeova. Jet iaan armej rein ej Noa, Ebream, Sera, Moses, im Devid. Armej rein ekoba ro jet rej ãinwõt juon ‘kõdo̦ el̦ap in ri kõnnaan ro.’ (Hibru 11:4–12:1) Ñe rej n̦aruon juon m̦õttam̦ ilo jikin ekajet kõn juon men ear jab kõm̦m̦ane, kwõnaaj m̦õn̦õn̦õ in kõnnaan im kwal̦o̦k m̦ool ñan jipañ eo m̦õttam̦. Ãindeinl̦o̦k wõt, kõmij m̦õn̦õn̦õ in kõnnaan im kwal̦o̦k m̦ool eo kõn Anij eo am.

Ilo am kõjerbale ãt in, kõmij l̦oore joñak eo an Jesus. Baibõl̦ ej n̦aetan Jesus “Ri Kõnnaan e tiljek im e m̦ool.” (Revelesõn 3:14) Jesus ear make ba bwe ear ‘kwal̦o̦k etan Anij’ im ear “kõnnaan kõn m̦ool” eo kõn Anij. (Jon 17:26; 18:37) Aolep rũkal̦oor ro rem̦ool an Christ rej jutak kõn etan Anij, Jeova, im kwal̦o̦k kake ñan ro jet. Eñin men eo Ri Kõnnaan ro an Jeova rej kate er ñan kõm̦m̦ane.

• Etke Ri Katak Baibõl̦ ro rar ukote ãt eo etaer im bõk ãt in Ri Kõnnaan ro an Jeova?

• Jãn kar ñããt eo ear wõr an Jeova ri kõnnaan ilo lal̦ in?

• Wõn Ri Kõnnaan eo em̦m̦antata an Jeova?