Awavule wakalola ngati Imipepele ya Nte zya kwe Yehova apano yatalisile nombanye. Lelo papita imyaka ukucila 2,700 ukufumilila pano awawomvi wa kwe Leza watalicizile ukwitwa ukuti “inte.” (Isaiah 43:10-12) Pano umwaka wa 1931 wutani wufike twamanyisilwe ukuti Awasambi wa Baibolo. Amulandu ci wuno twizile atutalika ukuyita ukuti Inte zya kwe Yehova?

Lyo-o izina likalenga Leza witu ukumanyikwa. Ukulingana na wa manuscripti awa kaali, izina lya kwe Leza ilya kuti Yehova likazanwamo imiku imivule sana mu Baibolo. Mu ma Baibolo amavule wafumyamo izina lyakuti Yehova nu kupyanikapo amalumbo ya kuti, Tatakulu nanti Leza. Lelo e Leza wacisinka wawumbulizile e Musa izina lyakwe ilyakuti Yehova, ukuti: “Lyo–o alili izina lyane umuyayaya.” (Ukufuma 3:15) Ukucita wo-o kwalenzile ayipusanyeko kwe twaleza tonsinye utwawufi. Ala tukakwivwa icete ukwitilwa kwi zina lya kwe Leza itele!

Likalondolola umulimo wuno tukawomba. Ukutalicila pe Abel, awantu awavule walanjizizye ukuti wawa ni suwilo iliwome mwe Yehova. Mukupita kwa mpindi, e Noa, Abrahamu, Sara, Musa, Davidi, ponga na wanji wizile awayisanzya pi “wumba lya nte ikulu.” (Waheberi 11:4–12:1) Wulyanye vino umuntu angalandilako umuntu winji mukoti wino ataluvinye avino nasweswenye tukalenga awantu ukumanya icisinka pe Leza witu.

Tukakolanya Yesu. E Baibolo ikamwita ukuti ‘inte ya cisinka swinya iya kusimicila’ (Ukuwumbulika 3:14) E Yesu umweneco nye walanzile ukuti ‘walenzile izina lya kwe Leza ukumanyikwa’ swinya watwalilizile ‘ukusambilizya iciine’ pe Leza. (Yohani 17:26; 18:37) Acino awawomvi wa kwe Leza wazipizile ukwitilwa kwi zina lyakwe nu kulenga limanyikwe. Wonye wo-o avino ni Nte zya kwe Yehova wakakwelezya na maka ukucita.

• Amulandu ci wuno awasambi we Baibolo wizile awatalika ukuyita izina lya kuti Inte zya kwe Yehova?

• Ampindi ci yino Yehova watalisile ukuwa ni nte munsi?

• Weweni Inte ya kwe Yehova wino walusya pe wonsinye?