Maske miakej moiljuiaj Jehová itlajtoltemakauaj se yankuik religión, amo nelia, pampa kipano se 2,700 xiuitl toTeotsij kintokaxtik itlajtoltemakauaj o “testigos” (Isaías 43:10-12). Achtouia kema ayamo eliyaya xiuitl 1931 kinixmatiyayaj kej Katli momachtiaj Biblia. Uajka, ¿kenke teipa timotokaxtijkej Jehová itlajtoltemakauaj?

Pampa titematiltiaj ajkia toTeotsij. Kema kiijkuilojkej Biblia toTeotsij itoka nesiyaya miakpa. Maske ipan miak Biblias kipatlatokej toTeotsij itoka ika toTeko o Dios, kema toTeotsij katli melauak kinojnotski Moisés kiiljuik ya itoka Jehová ika ni tlajtoli: “Xikiniljui ya ni elis notoka para nochipa” (Éxodo 3:15). Kej nopa kinextik ya amo eliyaya kej nopa sekinok teotsitsij tlen amo melauakej. Yeka tojuantij tlauel tipakij pampa timotokaxtiaj Jehová itlajtoltemakauaj.

Pampa kinextia tlake tekitl tijchiuaj. Miakej katli itstoyaj uejkajkia tlaneltokakej ipan toTeotsij Jehová. Achtoui kipeualtik Abel, ya kuali monejnemiltik. Uan kej panotiajki miak xiuitl sekinok nojkia “kineltokakej toTeko” kej Noé, Abraham, Sara, Moisés uan David (Hebreos 11:4–12:1). Kej se tlajtoltemakaketl kiijtoua iniixpa tlanauatianij tlen kimajtok tlen se akajya katli kuali iyolo, tojuantij nojkia timosentlalijtokej titeiljuisej katli melauak tlen Jehová.

Pampa tijchiuaj kej Jesús kichijki. Ipan Biblia kiijtoua Jesús ‘temachtli uan teiljuia tlen nelia xitlauak’ (Apocalipsis [Revelación] 3:14). Yaya tematiltik itata itoka uan nojkia kiijtok: “Niualajki nikaj para nitlamachtis tlen melauak” tlen toTeotsij (Juan 17:26; 18:37). Yeka katli melauak Jesús itokilijkauaj moneki temachtisej toTeotsij itoka uan motokaxtisej Jehová itlajtoltemakauaj. Ya nopa kichiuaj kampeka kichiuasej Jehová itlajtoltemakauaj.

• ¿Kenke katli kinixmatiyayaj kej Katli momachtiaj Biblia teipa motokaxtijkej Jehová itlajtoltemakauaj?

• ¿Kema pejki kinpia Jehová itlajtoltemakauaj ipan Tlaltipaktli?

• ¿Ajkia tlauel pankiski tlen nochi Jehová itlajtoltemakauaj ipan Tlaltipaktli?