Miakej taltikpakneminij kinemiliaj ke tiitaixpantijkauan Jiova yankuixtok peuak totaneltokalis. Sayoj ke, panoua dos mil setecientos xiujmejya, Biblia kijtoua ke itekitikauan Dios akin melauak kintokaytij ‘itaixpantijkauan’ (Isaías 43:10-12). Achtopa itech xiuit 1931 techixmatiaj kemej Momachtianij ika Biblia. ¿Keyej tikixtalijkej timotokaytiskej itaixpantijkauan Jiova?

Porin kiixnextia akoni toDios. Itokay Dios, Jiova, ixnesi panoua siete mil itech Biblia, kemej kinextiaj tataman uejkauj tajkuilolmej. Itech miak Biblias, nejin tokayit kipatanij uan kitalianij kemej toTajtsin oso Dios. Sayoj ke Dios akin melauak moteixmatiltij iuan Moisés kemej Jiova, uan kiiluij: “Nejin yejua notokay nochipaya” (Éxodo 3:15). Ijkon monextij ke yejuatsin amo kemej okseki tiotsitsin tein amo melaujkej. Tejuan titelyolpakij timoteixmatiltiskej ika tokayit yektik tein kipia Dios.

Porin kiixnextia tekit tein tikchiuaj. Ne uejkauj, miakej taltikpakneminij kiteixmatiltijkej ke takuaujtamatiaj iuan Jiova. Peuak iuan Abel akin melaujkanemik, uan ijkon kemej panouayaj miak xiujmej, Noé, Abrahán, Sara, Moisés, David uan oksekin, no mopoujkej iniuan “uel miakke taneltokani” (Hebreos 11:4–12:1). Ijkon kemej se taltikpaknenkej kitajtouia ininixpan tekiuanij se aksa akin amo teyi tauika, tejuan no ijkon tiknekij tikteixmatiltiskej akoni yekmelauj toDios.

Porin tikchiuaj ijkon kemej Jesús. Biblia kijtoua ke Jesús se akin “tanextilijtinemi sayo ika ten melau san” (Apocalipsis [Revelación] 3:14). Yejua kijtoj ke kiteixmatiltijka akoni iTajtsin uan ke ualajka tenextiliko ‘sayoj tein melauj’ ika Dios (Juan 17:26; 18:37). Yejua ika, akin yekmelauj imomachtijkauan moneki kinextiskej ke kitekitiliaj Jiova uan kiteixmatiltiskej itokay. Yejua nejon tein tiitaixpantijkauan Jiova timochikauaj tikchiuaskej.

• ¿Keyej Momachtianij ika Biblia satepan motokaytijkej itaixpantijkauan Jiova?

• ¿Kemanian peuak Jiova kinpia itaixpantijkauan nikan taltikpak?

• ¿Akoni okachi ueyi itaixpantijkauj Jiova?