Komatimej kijtowaj iga yej tajto̱lmoya̱waj de Jehová se̱ yankuiʼ religión. Pero kipiá ma̱j de dos mil setecientos xiwiʼ iga Dios yej melá̱, kijlij yej tekipanowa̱yaj iga yéj: «Anmejeme̱n antajto̱lmoya̱waj de nej» (Isaías 43:10-12). Achto de 1931 nei̱xmatiáj ken yej Momachtiáj Biblia. Pero, ¿te̱ íga timoto̱ka̱wijkej tajto̱lmoya̱waj de Jehová?

Iga kine̱xtiá a̱ʼ yéj to-Dios. Ito̱ka̱ Dios, Jehová, ne̱si ken siete mil biáj pan Biblia, ijkó̱n ken kine̱xtiá komati a̱mamej yej ikiápaya kan moijkuiloj la Biblia. Pan komati Biblias kipatakej iní̱n to̱ka̱ wan kita̱lijkej Señor o Dios. Pero Dios yej melá̱, mone̱xtij ken Jehová kua̱ tajtoj wan Moisés, kijlij: «Iní̱n noto̱ka̱ iga nochipa» (Éxodo 3:15). Ijkó̱n kine̱xtij iga ayéj ken seuʼmej dioses. Nejeme̱n nipa̱kij iga manikuigakan ito̱ka̱ Dios, se̱ to̱ka̱ yej chipaktiʼ.

Iga kine̱xtiá te̱ nikchi̱waj. Desde Abel yej kichij yej Dios kineki, pux komati tajta̱gamej tajtojkej de Jehová. Wan de ompa, seuʼmej ken Noé, Abrahán, Sara, Moisés wan David, yejeme̱n no̱ kalakikej pan iní̱n grupoj de yej «tajto̱lmoya̱waj» (Hebreos 11:4-12:1). Ijko̱nsan ken se̱ ta̱gaʼ yawi kan onoʼ se̱ juez wan kitajtowiliá ágaj yej akichij nité̱, nejeme̱n no̱ niknekij manikne̱xti̱kan yej melá̱ de to-Dios.

Iga nikchi̱waj ken Jesús kichij. Pan Biblia kijtowa iga Jesús se̱ «tajto̱lmoya̱wa yej nochipa kijtowa yej melá̱ wan atakajkaya̱wa» (Revelación [Apocalipsis] 3:14). Yéj kijtoj iga wa̱laj pan Ta̱jli iga kine̱xtiko ito̱ka̱ de Itaj wan kijto̱ko yej melá̱ de Dios ( Juan 17:26; 18:37). Inó̱n iga, yej melá̱ kitokaj Jesús moneki makiwi̱gakan ito̱ka̱ Jehová wan makine̱xtili̱kan seuʼmej. Yej nitajto̱lmoya̱waj de Jehová nimotekitiliáj iga manikchi̱wakan iní̱n.

• ¿Té̱ íga timoto̱ka̱wijkej tajto̱lmoya̱waj de Jehová wan ayoʼ ken yej Momachtiáj Biblia?

• ¿Desde ke̱man onokej yej tajto̱lmoya̱waj de Jehová nigaj pan Ta̱jli?

• ¿A̱ʼ yéj yej ma̱j ye̱kti tajto̱lmoya̱wa de Jehová?