Abantu baingi nibateekateeka ngu Abajurizi ba Yehova n’ediini nsya. Kwonka emyaka erengire 2,700 enyima, abaheereza ba Ruhanga omwe ow’amazima Baibuli ekabeeta “baakareebi” nari abajurizi be. (Isaaya 43:10-12) Omwaka 1931 gutakahikire, tukaba nitumanywa nk’Abeegi ba Baibuli. Ahabw’enki bwanyima twayetsirwe Abajurizi ba Yehova?

N’ahabwa Ruhanga ou turikuramya. Okurugiirira aha bihandiiko ebya ira, eiziina rya Ruhanga, Yehova, omu Baibuli ririmu emirundi erikurenga ahari kashanju. Omu Baibuli nyingi ezivuunwirwe, eiziina eryo bakariihamu omu mwanya gwaryo baatamu ebitiinisa nka Mukama nari Ruhanga. Kwonka Ruhanga akaba yaagambiire Musa eiziina rye arikugira ati: “Niinye Yehova.” (Okuruga 6:2) Omu kukora ekyo, akeetaanisa ahari baaruhanga abandi boona ab’ebishuba. Nikitwesiimisa okwetererwa eiziina rya Ruhanga eririkwera.

Eiziina eryo niryoreka eki turikukora. Abantu ba ira kutandika na Abeeli, bakooreka ngu bakaba nibaikiririza omuri Yehova. Bwanyima, Noa, Abrahamu, Saara, Musa, Daudi, n’abandi bakaba bamwe aha “omutwe muhango gwa baakareebi.” (Abaheburaayo 11:4–12:1) Nk’oku omuntu arikubaasa kuha obujurizi omu icwero ry’emanja aha muntu orikujunaanwa, naitwe tumaririire kumanyisa abandi amazima agarikukwata ahari Ruhanga waitu.

Nitutooreza Yesu. Baibuli neemweta “kareebi [omujurizi] omwesigwa.” (Okushuuruurwa 3:14) Yesu akagira ngu ‘akamanyisa eiziina rya Ruhanga’ kandi akaguma naamanyisa abandi amazima agarikukwata ahari Ruhanga. (Yohaana 17:26; 18:37) N’ahabw’ekyo, abakuratsi ba Yesu ab’amazima baine kwetererwa eiziina rya Yehova kandi bakarimanyisa abandi. Eki nikyo Abajurizi ba Yehova barikukora.

• Ahabw’enki Abeegi ba Baibuli bwanyima baayetsirwe Abajurizi ba Yehova?

• Yehova atwire aine abajurizi omu nsi kwiha ryari?

• Omujurizi wa Yehova omukuru n’oha?