Abandu bingi bakwinoghona ukuti Abaketi ba Yehova ngamu ya kipanga ikipya. Loli fikindilepo ifinja 2,700 ukufuma pakabalilo aka ababombi ba Kyala balyandile ukumanyiwa ukuya “baketi.” (Yesaya 43:10-12) Ukwanda kunyuma kosa ufika mu 1931, twamanyiwagha ukuti “Bamanyili ba Baibolo.” Nongwa yafiki twasalile ukuya Baketi ba Yehova?

Ingamu yitu yibatula abandu ukum’manya Kyala witu. Amalo mingi m’mabuku amakulu ingamu ya Kyala, Yehova, yikwaghiwamo utubalilo twingi. Ingamu iyi m’maBaibolo mingi yisosiwemo, abene bolemba ukuti Ntwa pamo Kyala. Loli Kyala wabwanaloli ayobile ingamu yake kwa Mose ukuti yo Yehova, atile: “Yiyiyi yo ngamu yangu bwila na bwila.” (Ukusoka 3:15) Nongwa ya ngamu yake iyi, umwene aleghene na ba kyala bosa ababutungulu. Uswe tuhoboka umanyiwa ni ngamu iyi.

Ingamu yitu yikunangisya imbombo yitu ingulumba. Ukwanda akabalilo kakunyuma, abandu bingi ngati Abeli, bakoleliwe ukuya baketi nongwa ya lwitiko lwabo kwa Yehova. Bo akabalilo kakindilepo, Nowa, Abrahamu, Sara, Mose, Davidi na bangi bope bali “nkilundilo ikikulumba ikya baketi.” (Bahiburi 11:4–12:1) Muno umundu abaghile ukuya nketi pamo kaboni wa yungi ku khoti, nuswe tuli baketi ba Kyala ukufumusya ubwanaloli bwake.

Tukonga Yesu. IBaibolo liyoba isya Yesu ukuti ‘nketi nsubiliwa kangi wanaloli.’ (Ubusetuli 3:14) Umwene Yesu ayobile atile ‘abamanyisye abandu ingamu ya Kyala’ kangi akindilile ‘ukubusimikisya ubwanaloli’ bwa Kyala. (Yohani 17:26; 18:37) AbaKristu bosa ba bwanaloli bolondiwa ukuti bamanyiweghe ni ngamu ya Yehova kangi babamanyisyeghe abangi isya ngamu iyi. Isi syo Abaketi ba Yehova bakwiyula ubomba.

• Nongwa yafiki Abamanyili ba Baibolo basalile ingamu yakuti Baketi ba Yehova?

• Ngimba Yehova alyandile ndili ukuya na baketi bake pa kisu?

• Ngimba nketi nkulumba fiyo wa Yehova yo aliku?