Беретӕмӕ уотӕ кӕсуй, ӕма Йегови Ӕвдесӕнти дин ӕрӕги фӕззиндтӕй. Фал 2 700 анзей размӕ ӕцӕг Хуцау ӕ лӕггадгӕнгути туххӕй загъта, «ме ’вдесӕнтӕ», зӕгъгӕ (Исай 43:10–12). 1931 анзи уонгӕ нӕ зудтонцӕ Библиӕртасгутӕй. Мадта нӕхе Йегови Ӕвдесӕнтӕ хонун цӕмӕн райдӕдтан?

Еци ном ӕвдесуй, нӕ Хуцау ка ӕй, уой. Рагон къохфинститӕмӕ гӕсгӕ, Хуцауи ном Йеговӕ Библий ӕмбӕлуй 7 000 хаттемӕй фулдӕр. Берӕ тӕлмацти Хуцауи ном ӕндӕр дзурдтӕй раййивтонцӕ, зӕгъӕн, «Хуцау» кенӕ «Дуйнедарӕг». Фал Хуцау Моисеймӕ ку фӕззиндтӕй, уӕд ин раргом кодта ӕ ном, Йеговӕ, ӕма ин загъта: «Еци номӕй мӕ зондзӕнцӕ фӕлтӕрӕй-фӕлтӕрмӕ» (Рацуд 3:15). Уомӕй Хуцау бавдиста, еугур мӕнгӕ хуцӕуттӕй дӕр ке хецӕн кӕнуй, уой. Мах нӕхецӕн устур кадӕбӕл нимайӕн, Хуцауи кӕдзос ном ке хӕссӕн, уой.

Еци номӕй бӕрӕг ӕй, ци куст кӕнӕн, е. Зӕнхӕбӕл алкӕддӕр адтӕй, Йегови туххӕй иннетӕн ка дзурдта, уӕхӕн адӕм. Библи сӕ хонуй «ӕвдесӕнти... устур мегъӕ». Уонӕй фиццаг адтӕй Авель. Сӕ астӕу ма адтӕнцӕ Ной, Авраам, Саррӕ, Моисей, Давид ӕма ма берӕ ӕндӕр кадӕртӕ дӕр (Дзиуиттӕгтӕмӕ 11:4–12:1). Ӕнӕфуд адӕймаги сӕрбӕл ӕвдесӕн куд фӕдздзоруй, уотӕ мах дӕр иннетӕн дзорӕн, нӕ Хуцау ӕцӕгӕй цӕхуӕн Хуцау ӕй, уой туххӕй.

Уотемӕй фӕнзӕн Йесо Киристей. Библи ӕй хонуй «еузӕрдон ӕма ӕцӕг ӕвдесӕн» (Раргомадӕ 3:14). Киристе зӕнхӕмӕ уой туххӕй ӕрцудӕй, цӕмӕй адӕмӕн Хуцауи ном раргом кодтайдӕ ӕма ин ӕвдесӕн адтайдӕ (Иоанни 17:26; 18:37). Мадта Киристей фӕдбӕлдзӕугутӕ дӕр гъӕуама Йегови ном хӕссонцӕ ӕма ’й адӕмӕн ӕргом кӕнонцӕ. Ӕма Йегови Ӕвдесӕнтӕ дӕр еци гъуддагбӕл архайунцӕ.

• Библиӕртасгутӕ сӕхе Йегови Ӕвдесӕнтӕ хонун цӕмӕн райдӕдтонцӕ?

• Йеговӕн зӕнхӕбӕл ӕвдесӕнтӕ кӕд фӕззиндтӕй?

• Йеговӕн сӕйраг ӕвдесӕн ка ӕй?