سبق 2
سانوں یہوواہ دے گواہ کیوں کہیا جاندا اے؟
نوح
ابراہام
موسیٰ
یسوع مسیح
کئی لوک سوچدے نیں کہ ”یہوواہ دے گواہ“ اِک نویں مذہب دا ناں اے۔ پر 2700 سال پہلاں سچے خدا نے اپنے خادماں نُوں اپنا ”گواہ“ کہہ کے بلایا سی۔ (یسعیاہ 43:10-12) سن 1931ء تک سانوں ”بائبل سٹوڈنٹس“ کہیا جاندا سی۔ فیر اَسی ناں یہوواہ دے گواہ کیوں اپنا لیا؟
ایس ناں توں پتہ چلدا اے کہ یہوواہ ساڈا خدا اے۔ بائبل دے پرانے نسخیاں وچ خدا دا ناں یہوواہ تقریباً 7000 واری آیا اے۔ پر بائبل دے کئی ترجمیاں وچوں یہوواہ دا ناں کڈھ کے ”خدا“ یاں ”خداوند“ لکھ دِتا گیا اے۔ بوہت چِر پہلاں سچے خدا نے اپنے خادماں نُوں کہیا سی کہ یہوواہ مَیں آں تے ایہو ای میرا ناں اے۔ (یسعیاہ 42:8) اپنا ناں دس کے اوہنے اپنی پچھان کرائی کہ اوہ جھوٹھے معبوداں توں بالکل فرق اے۔ سانوں بڑا مان اے کہ اَسی خدا دے پاک ناں یہوواہ توں پچھانے جانے آں۔
ایس ناں توں پتہ چلدا اے کہ اَسی کیہہ کم کرنے آں۔ ہزاراں سالاں توں کئی لوک ایہہ گواہی دیندے آئے نیں کہ یہوواہ اوہناں دا خدا اے۔ ایہناں لوکاں دی شروعات راستباز ہابل توں ہوئی۔ فیر صدیاں دوران نوح، ابراہام، سارہ، موسیٰ، داؤد تے بتھیرے ہور لوک گواہواں دے وڈے بدّل وچ رَل دے گئے۔ (عبرانیوں 11:4–12:1) جیس طرحاں کوئی شخص عدالت وچ کسے بےقصور دے حق وچ گواہی دیندا اے، اوسے طرحاں اَسی وی پکا ارادہ کیتا اے کہ اَسی لوکاں نُوں خدا بارے گواہی دین توں کدی پچھے نئیں ہٹاں گے۔
اَسی یسوع مسیح دی مثال تے چلنے آں۔ بائبل وچ یسوع مسیح نُوں وفادار تے سچا گواہ کہیا گیا اے۔ (مکاشفہ 3:14) یسوع مسیح نے لوکاں نُوں خدا دے ناں بارے دسیا تے سچائی بارے گواہی دِتی۔ (یوحنا 17:26؛ 18:37) ایس لئی یسوع مسیح دے سچے پیروکاراں نُوں اپنی پچھان یہوواہ دے ناں توں کرانی چاہیدی اے تے ایس ناں دا اعلان کرنا چاہیدا اے۔ اَسی ایہہ کم کرن دی پُوری کوشش کرنے آں۔
-
اَسی ناں یہوواہ دے گواہ کیوں اپنایا اے؟
-
وفادار لوک کدوں توں یہوواہ بارے گواہی دیندے آئے نیں؟
-
یہوواہ خدا دا سب توں وفادار تے سچا گواہ کون اے؟