Ashca personas creencu Jehóvap testigusnin suj religión mósoj casckaycuta. Pero mana chayna can, na ’ruan 2.700 huatas Yáyap siervusninta sutichicora paypa «testigusnin» (Isaías 43:10-12). 1931 huatacama Bibliát Estudiajcuna ina ’rejsisckas caraycu. ¿Ímaj Jehóvap testigusnin huajyacuyta ajllaraycu?

Yachachiaycu pi Yayaycu can. Bibliapi Yáyap sutin, Jehová, ancha ashca cutis ’ricurin, imaina ashca escrituraspi ñaupamanta ’ricurin. Ashca Bibliaspi Yáyap sutinta sorckorancu y churarancu Yaya o Señor. Pero, Tata Yaya, Moises ñauckenpi Jehová ina presentacora y nipora: «Cá sutiy can únay unáypaj» (Éxodo 3:15). Chayna ckaachera ima mana quiquin sujcuna llulla dioses ina can. Nockaycu ancha orgullosos tiaycu Yáyap sutinta apasckaycuraycu.

Ckaachin ’ruasckaycuta testigus ina. Abelmanta ckallaris y chaymanta ashca ckaris y huarmis fencumanta Jehovapi ’rimarancu. Huatas chaymanta, sujcuna Noé ina, Abrahan ina, Sara ina, Moises ina y Davichu ina quiquin ’ruarancu (Hebreos 11:4–12:1). Si ckam suj alli yanasu apinqui, pero sujcuna mana allít paymanta ’rimancu, ¿imát ’ruanquiman? Ckam yanasuyquita deféndej ’rinqui y paymanta ciertu casckanta nej ’rinqui. Chayna nockaycupas desidisckas tiaycu Yayaycumanta ciertu casckanta ’rimayta.

Jishút yachapiaycu. Biblia Jishuta huajyan «testigu fiel y verdaderu» (Revelación 3:14). Pay nera ima Tatanpa sutinta ’rejsichisa cara y amusa cara «ciertu casckanta ’rimáypaj» Yayamanta (Juan 17:26; 18:37). Chayraycu, cristianus verdaderus Jehóvap sutinta apanaycu tían y ’rejsichinaycu tían. Chayraycu Jehóvap testigusnin chayta ’ruayta esforsacuycu.

• ¿Ímaj Jehóvap testigusnin huajyacuyta ajllaraycu y mana Bibliát Estudiajcuna ina?

• ¿Aicapmanta Jehová ashpapi testigusta apera?

• ¿Pichus astaan atun Jehóvap testigun can?