Batinyu mannira Yihowa Farciˈraasine haarote daggino ammaˈno harunsitannore labbannonsa. Ikkollana, 2,700 saˈˈanno diri albaanni heedhinori mittichu halaalaanchu Magani soqqamaano isi “farciˈraasine” yaamantinota xawinsoonni. (Isayyaasi 43:10-12) Ninke 1931 geeshsha Qullaawu Maxaafi Rosaano yaamammanni keeshshinoommo. Yihowa Farciˈraasine yaamama hananfoommohu mayiraati?

Kuni suˈmi Maganinke ayetiro egensiisanno. Angatenni borreessinoonniti biˈree borro kultannonte gede, Yihowa yinannihu Maganu suˈmi Qullaawu Maxaafi giddo lowo kume ikkitanno basera borreessamino. Batinye Qullaawu Maxaafi tiro giddo, konni suˈmi bayicho Mooticha woy Magano yinannire maaragete suˈmuwa eessinoonni. Ikkollana, halaalaanchu Magani isonooto Musera egensiisinohu Yihowa yinannihu umisi suˈminniiti; Isi togo yiino: “Hegere geeshsha suˈmiˈya konneeti.” (Wolapho 3:15) Konni garinni isi kaphu maganna baalantenni baxxinoha ikkinota buuxisino. Qullaawu Maganu suˈminni woshshamanke lowo geeshsha tashshi assitannonke.

Kuni suˈmi loosinke maatiro kulanno. Keeraanchu manchi Abeelinni hanafe hundihu lowo manni Yihowa ammanannota farciˈranni keeshshino. Hundinni kayise Nohi, Abirahaami, Saara, Muse, Daawiti, hattono wolu manni ‘lowo gomichi gede ikkitino farciˈraasine’ aana lexxanni dayino. (Ibiraawuyaani 11:4–12:1) Mittu manchi yoote mine mare beebbate cubbinshoonni manchira halaale farciˈrannonte gede, ninkeno mannu Maganinkere halaale afanno gede assate murciˈne kaˈnoommo.

Konni suˈminni woshshamankenni Yesuusi lawishsha harunsinoommo. Qullaawu Maxaafi Yesuusi ‘ammanaminohanna halaalaancho naqaashe’ woy farciˈraasincho ikkinota kulanno. (Ajuuja 3:14) Yesuusi umisi mannu ‘Maganu suˈma afanno gede’ assinotanna Maganu ‘halaale farciˈrinota’ coyiˈrino. (Yohaannisi 17:26; 18:37) Konni daafira, halaalunni Kiristoosi harunsitannori Yihowa suˈminni woshshamanna konne suˈma mannaho kula hasiissannonsa. Yihowa Farciˈraasine tenne assate lowonta sharrantanni no.

• Qullaawu Maxaafi Rosaano Yihowa Farciˈraasine yaamama hanaffinohu mayiraati?

• Yihowa farciˈraasine uullate aana heeˈra hanaffunku mageeshshi yanna ikkanno?

• Qaru Yihowa Farciˈraasinchi ayeti?