Ko te tokalahi o nā tino e mafaufau vēia ko Molimau a Ieova ko he igoa o he lotu fou. I te hili atu ma te 2,700 tauhaga kua teka, ko nā kaukauna a te Atua moni nae fakailoa ko ana “molimau.” (Ihaia 43:​10-12) E pa atu ki te 1931, na iloa ai ki matou ko ni Tino Ākoga o te Tuhi Paia. Aiheā na kavea ai e ki matou te igoa Molimau a Ieova?

E fakailoa ai te matou Atua. E tuha ai ma nā tuhituhiga anamua, ko te igoa o te Atua ko Ieova, e fia afe taimi e aliali ai i te Tuhi Paia. I te lahiga o nā fakaliliuga kua toe hui ai te igoa ki he taku, e vē ko te Aliki pe ko te Atua. Kae, na fakailoa te Atua moni ia ia ki a Mohe i tona igoa totino, ko Ieova, e vagana mai: “Ko toku igoa tēnā e fakavavau.” (Ehoto 3:15) Ko tēnei te auala, na fakakehe ai ia mai nā atua hehē. E mitamita ki matou i te taukave o te igoa paia o te Atua.

E fakamatala te matou fekau fakamihionale. I nā vaitaimi anamua ko he fakahologa loa o tagata amiotonu, kamata mai ia Apelu, na molimau atu ki tō latou fakatuatua ki a Ieova. I te fakahologa o nā henituli, ko Noa, Apelaamo, Hala, Mohe, Tavita, ma iē tahi na kau fakatahi ma te “kaifenua tokalahi o tagata e fai ma molimau.” (Epelu 11:​4–12:1) E vē ko te molimau atu o he tino fokotahi i te falefakamahino mo he tino e mamā, ko ki matou e lotomalolohi ke fakailoa atu te kupu moni e fakatatau ki te matou Atua.

Ko ki matou e fakatakitaki ki a Iehu. E takua ia e te Tuhi Paia “te molimau e fakamāoni ma e moni.” (Fakaaliga 3:14) Na vagana mai lava ia Iehu ko ia na ‘fakailoa te igoa o te Atua’ ma fakaauau i te ‘molimau atu ki te kupu moni’ e uiga ki te Atua. (Ioane 17:26; 18:37) Ko nā hoko moni o Keliho e tatau ke molimau ki te igoa o Ieova ma fakalauiloa. Ko tēnei te mea e taumafai oi fai e Molimau a Ieova.

• Aiheā na fakaaogā ai e nā Tino Ākoga o te Tuhi Paia te igoa Molimau a Ieova?

• Ko he ā te mataloa nae i ei ai nā Molimau a Ieova i luga o te lalolagi?

• Ko ai te Molimau hilihili a Ieova?