Bantu biingi bayeya kuti Bakamboni baJehova ndizina lyacikombelo cipya. Pesi kwaminyaka iinda ku 2 700 yakiinda, babelesi baLeza wakasimpe mbimbabo bakali kutegwa “bakamboni” bakwe. (Isaya 43:10-12) Kuzoosika mu 1931, twakali kutegwa Mbayiiyi baBbaibbele. Nkaambo nzi nitubelesya izina lyakuti Bakamboni baJehova?

Lizibya izina lyaLeza wesu. Kweelana amabbuku eciindi izina lyaLeza liti Jehova, lyakali kujanika ziindi ziinji muBbaibbele. Busanduluzi bwamaBbaibbele miingi, bwakancinca izina eeli akulemba mazina aakulemeka aakuti Leza naa Mwaami. Pesi Leza wakasimpe wakalyaamba izina lyakwe kuli Musa, Jehova wakati: “Ndendilyo izina lyangu lyoonse.” (Kulonga 3:15) Munzila eeyi, wakalisiyanisya abaleza boonse bakubeja. Tulapakala kwiitwa azina eeli lisalala lyaLeza.

Lipandulula mulimu wesu. Mulongo wabantu baciindi, kutalika amwaalumi uululeme Abelo, bakapa bukamboni atala alusyomo lwabo muli Jehova. Pesi mukweenda kwaciindi, Nowa, Abrahamu, Sara, Musa, Davida, alimwi abamwi bakanjilila “kumakamu makamu aabakamboni.” (baHebrayo 11:4–12:1) Mbubwenya mbuli muntu mbwakonzya kupa bukamboni munkuta, kayimikilila muntu uutakwe mulandu. Andiswe tweelede kuzibisya kasimpe kali atala aLeza wesu.

Tutobelezya cikozyano caJesu. IBbaibbele limwaamba kuti ‘ngukamboni uusyomeka alimwi wamasimpe.’ (Ciyubunuzyo 3:14) Jesu lwakwe wakaamba kuti ‘wakazibya izina lyaLeza’ alimwi ‘wakali kupa bukamboni bwakasimpe’ atala aLeza. (Johane 17:26; 18:37) Batobeli baJesu beelede kwiitwa azina lyaJehova, akulizibisya zina eeli. Eezi nzezizyo iziliikucitwa aBakamboni baJehova.

• Nkaambo nzi Bayiiyi baBbaibbele nibakasala kubelesya zina lyakuti Bakamboni baJehova?

• Jehova wakabaa Bakamboni aanyika kwaciindi cilamfu biyeni?

• Ngwani Kamboni waJehova mupati?