Baingi batekereza ngu Abakaiso ba Yahwe ibara lye diini empyaka. Baitu n’abahereza ba Ruhanga ababaireho emyaka 2,700 erabireho nabo bamanywaga nk’Abakaiso be. (Isaya 43:10-12) Kuhikira kimu omu mwaka 1931 twamanywaga nk’abeegi ba Baibuli. Habwaki tukatandika kwetwa Abakaiso ba Yahwe?

Ibara linu lyoleka Ruhanga ou turamya. Kusigikirra ha bihandiiko ebyaira ibara lya Ruhanga Yahwe lisangwa omu Baibuli emirundi erikuhingura omu nkumi n’enkumi. Omu mpindura ezirukukira obwingi ibara linu likaihibwamu kandi omu kiikaro kyaalyo hatekwamu ebitiniisa nka Mukama na Ruhanga. Baitu Ruhanga ow’amananu akaba amazire ira kumanyisa Musa ibara lye Yahwe, n’agamba “Eri niryo ibara lyange ebiro byona.” (Okuruga 3:15) Ibara linu limwahukaniza ha ba ruhanga abandi abatali b’amananu. Mugisa gw’amaani kwetwa ibara lya Ruhanga erirukwera.

Lyoleka ekigendererwa kyaitu. Kutandika n’omusaija omwesigwa Aberi, abantu bakaikara nibahereza obwakaiso habw’okwikiriza kwabu omu Yahwe. Omu byasa ebyahondiireho, Nuha, Iburahimu, Sara, Musa, Daudi, n’abandi baingi baketeraniza ha ‘kitebe kyabakaiso’ kinu. (Abaheburaniya 11:4–12:1) Nkoku omuntu aha obwakaiso omu kooti habw’ogu atanyina musango, naitwe tumalirire kumanyisa amananu agarukukwata hali Ruhanga waitu.

Tutwara ekyokurorraho kya Yesu. Baibuli emweta “kaiso wokwesiga owamazima.” (Okusuku’rwa 3:14) Yesu wenyini akagamba ‘akaboleka ibara lya Ruhanga’ kandi ‘akaikara n’arangirra amananu’ agarukukwata hali Ruhanga. (Yohana 17:26; 18:37) Nahabwekyo abahondezi ba Kristo ab’amananu basemerire kukozesa ibara lya Yahwe n’okulimanyisa. Kinu nikyo Abakaiso ba Yahwe barukulengaho muno kukora.

• Habwaki abeegi ba Baibuli bacwiremu kweyeta Abakaiso ba Yahwe?

• Yahwe amazire kasumi ki aine abakaiso omu nsi?

• Mu Bakaiso be, nooha arukukirayo?