Хөй улустуң саналы-биле алырга, Иегованың Херечилери дээрге бир-ле чаа шажынның ады-дыр. Ынчалза-даа 2700 ажыг чыл бурунгаар-ла дың чаңгыс алыс шын Бурганның бараалгакчыларын ооң «херечилери» деп адап турган (Исайя 43:10—12). Бис 1931 чылга чедир Библияның Шинчилекчилери кылдыр билдингир чораан бис. Ынчаарга чүге «Иегованың Херечилери» деп атты хүлээп алган бис?

Ол ат бистиң Бурганывыс кым дээрзин тода айтып турар. Бурунгу бижиктер-биле алырга, Бурганның Иегова деп ады Библияда элээн каш муң катап таваржып турар. Очулгаларның хөй кезиинде ол атты «Дээрги-Чаяакчы» болгаш «Бурган» деп ат-дужаалдар-биле солаан. Ынчалза-даа алыс шын Бурган Моисейге бодунуң адын «Иегова» деп ажыдып берген. Ол тода чугаалаан: «Мээң кезээ мөңгеде артып каар адым ол-дур» (Хосталыышкын 3:15) *. Шак ынчаар ол бодун шупту меге бурганнардан аңгылаан. Ынчангаш бис Бурганның ыдыктыг адын эдилеп турарывыска чоргаарланыр бис.

Ол ат кандыг ажылды чорудуп турарывысты көргүзүп турар. Эрткен үеде, чөптүг-шынныг Авельден эгелээш, дыка хөй Бурганның бараалгакчылары Иеговага бүзүрелин херечилеп турганнар. Чүс-чүс чылдар дургузунда Ной, Авраам, Сарра, Моисей, Давид болгаш Бурганга шынчы оон-даа өске эр-даа, херээжен-даа кижилер бүзүрелин херечилээннер (Еврейлерге 11:4—12:1). Шүүгү черинге херечиниң актыг кижини камгалап турары дег, бис база Бурганывыстың дугайында шынны дидими-биле өскелерге чугаалап турар бис.

Иисустуң үлегерин эдерип турар бис. Библия ону «алыс шынныг болгаш шынчы херечи» деп адап турар (Ажыдыышкын 3:14). Ол Бурганның адын улуска ажыткан база Адазының дугайында алыс шынны херечилээр дээш, бо делегейже келген (Иоанн 17:26; 18:37). Ынчангаш Христостуң эдерикчилери Иегованың адын эдилеп, ону өскелерге ажыдар ужурлуг. Шак-ла ону Иегованың Херечилери кылырын кызып турар.

• Чүге Библияның Шинчилекчилери «Иегованың Херечилери» деп атты хүлээп алганыл?

• Иегованың чер кырынга херечилери кажан тыптып келгенил?

• Кымны Иегованың өндүр улуг Херечизи деп адап болурул?