Vhathu vhanzhi vha humbula uri Ṱhanzi dza Yehova ndi dzina ḽa vhurereli vhuswa. Naho zwo ralo, miṅwaha i fhiraho 2700 yo fhelaho, vhashumeli vha Mudzimu muthihi fhedzi wa ngoho vho vha vha tshi vhidzwa “Ṱhanzi” dzawe. (Yesaya 43:10-12) Vho vha vha tshi vhidzwa Vhagudi vha Bivhili u swika nga 1931. Ndi ngani ro thoma u shumisa dzina Ṱhanzi dza Yehova?

Ḽi ṱalula Mudzimu washu. U ya nga maṅwalwa a kale, dzina ḽa Mudzimu ḽine ḽa vha Yehova, ḽi bvelela lunzhi-lunzhi Bivhilini. Kha ṱhalutshedzelo nnzhi, ḽeneḽi dzina ḽo dzhielwa vhudzulo nga madzina zwao a ngaho Murena kana Mudzimu. Fhedzi Mudzimu wa ngoho o ḓidzumbulula kha Mushe nga dzina ḽawe ḽine ḽa pfi Yehova, a ri: “Ndi ḽone dzina ḽanga tsha kale na kale.” (Ekisodo 3:15) Nga yeneyi nḓila, o ḓiṱalula kha midzimu yoṱhe ya mazwifhi. Ri ḓirwa khana nga u vhidzwa nga dzina ḽikhethwa ḽa Mudzimu.

Ḽi ṱalusa mushumo washu. Zwifhingani zwa kale vhathu vhanzhi vho ṱanziela nga ha u vha havho na lutendo kha Yehova u thoma nga Abele, munna o lugaho. Maḓanani a miṅwaha e a tevhela, Noaxe, Abrahamu, Sara, Davida na vhaṅwe vho ṱanganela na ḽeneḽi ‘gole ḽa dziṱhanzi’ ḽihulwane. (Vha-Heberu 11:4–12:1) Samusi muthu a tshi nga ṋea vhuṱanzi khothe a tshi itela muthu a si na mulandu, ro ḓiimisela u ḓivhadza ngoho nga ha Mudzimu washu.

Ri khou edzisa Yesu. Bivhili i mu vhidza “ṱhanzi i fulufhedzeaho na ya ngoho.” (Nzumbululo 3:14) Yesu ene muṋe o amba uri o ‘ḓivhadza dzina ḽa Mudzimu’ nahone a bvela phanḓa a tshi ‘ṱanziela mafhungo-ngoho’ nga ha Mudzimu. (Yohane 17:26; 18:37) Nga zwenezwo, vhatevheli vha vhukuma vha Kristo vha fanela u ṱanziela dzina ḽa Yehova na u ḽi ḓivhadza. Hezwi ndi zwine Ṱhanzi dza Yehova vha khou lwela u zwi ita.

• Ndi ngani Vhagudi vha Bivhili vho thoma u shumisa dzina Ṱhanzi dza Yehova?

• Yehova u na tshifhingani tshingafhani e na ṱhanzi kha ḽifhasi?

• Ndi nnyi Ṱhanzi khulwanesa ya Yehova?