Ginhuhunahuna han damu nga an Mga Saksi ni Jehova ngaran hin bag-o nga relihiyon. Kondi sobra 2,700 ka tuig na an naglabay, an mga magsiringba han amo la nga tinuod nga Dios gintawag sugad nga iya “mga saksi.” (Isaias 43:10-12) Tubtob han 1931, mga Estudyante han Biblia an tawag ha amon. Pero kay ano nga ginkarawat namon an ngaran nga Mga Saksi ni Jehova?

Nagpapakilala ito han ngaran han amon Dios. Sumala ha kadaan nga mga manuskrito, an ngaran han Dios, Jehova, mababasa ha Biblia hin yinukot ka beses. Ha damu nga hubad ginsaliwnan ini nga ngaran hin mga titulo sugad han Ginoo o Dios. Kondi, nagpakilala an tinuod nga Dios kan Moises gamit an iya personal nga ngaran nga Jehova ha pagsiring: “Amo [ini] an akon ngaran ha waray kataposan.” (Eksodo 3:15) Hini nga paagi iginpakita niya nga iba hiya ha ngatanan nga buwa nga dios. Gintatagad gud namon nga pribilehiyo an pagdara han baraan nga ngaran han Dios.

Nagsusumat ito han amon buruhaton. Ha kadaan nga panahon, damu nga tawo, tikang ha matadong nga hi Abel, an nagsaksi o nagtestigo mahitungod han ira pagtoo kan Jehova. Ha paglabay han mga siglo, hira Noe, Abraham, Sara, Moises, David, ngan iba pa nagin bahin hinin “daku nga dampog han mga testigo.” (Hebreo 11:4–12:1) Sugad la nga an usa mahimo magtestigo ha korte para ha usa nga inosente, determinado kami nga ipasamwak an kamatuoran mahitungod han amon Dios.

Nagsusubad kami kan Jesus. Gintatawag hiya han Biblia nga “an matinumanon ngan matuod nga testigo.” (Pahayag 3:14) Hi Jesus mismo nagsiring nga iya ‘iginpakilala an ngaran han Dios’ ngan padayon nga ‘nagtestigo han kamatuoran’ mahitungod ha Dios. (Juan 17:26; 18:37) Salit, sadang gamiton ngan ipakilala han tinuod nga mga sumurunod ni Kristo an ngaran ni Jehova, ngan ito an amon ginpapangalimbasogan nga buhaton.

• Kay ano nga gintatawag kami nga Mga Saksi ni Jehova?

• Tikang pa kakan-o nagkaada hi Jehova mga saksi dinhi ha tuna?

• Hin-o an nangunguna nga Saksi ni Jehova?