Maro olo mivolan̈a fa Vavolombelon̈o Jehovah io fivavahan̈a vaovao. Zen̈y tsy marin̈y. “Vavolombelon̈o Jehovah” nikahian̈a iro Israelita aby io, fotony iro nivavaka tamy Jehovah, efa 2 700 taon̈o zay loso. (Isaia 43:10-12) Talohany 1931, Pianatra Baiboly nikahian̈a zahay. Nan̈ino ma zahay nangala an̈aran̈a Vavolombelon̈o Jehovah nanomboko tamy zen̈y?

An̈aran̈a io man̈ambara Zan̈ahary ivavahanay. Tamy Baiboly vo nisoratin̈y tan̈y, an̈aran̈a Jehovah io nisy im-7 000 mipody. Amy Baiboly sasany, an̈aran̈a Jehovah io soloandro Tompo ndreky Andriamanitra fo. Rango efa ela be tan̈y, Zan̈ahary efa nan̈ambara Mosesy an̈aranany. Volan̈iny karaha ty: ‘Efa Jehovah zen̈y edy an̈aranakahy, fa tsy miova eky.’ (Eksodosy 3:15) Hitantsika baka amy zen̈y fa izy tsy mira zan̈ahary jiaby ivavahanolo io. Zahay Vavolombelon̈o Jehovah ravoravo mitondra an̈aran̈a io.

Izio man̈ambara asa ataonay. Efa rango ela nisiany Vavolombelon̈o Jehovah. Voanalohany amy zen̈y Abela, fotony izy nanompo Jehovah fo. Tafaranizen̈y koa ry Noa, Abrahama, Saraha, Mosesy, Davida. Mbala tsendriky jiaby io. (Hebreo 11:4–12:1) Vavolombelon̈o zen̈y, olo araiky mitsangana amy fitsaran̈a, mivolan̈a raha hitany ndreky raha ren̈iny momba olo araiky tohan̈any. Zahay koa von̈ono han̈ambara aminolo raha hainay momba Zan̈aharinay Jehovah io.

Jesosy koa Vavolombelon̈o Jehovah. Baiboly mivolan̈a fa Jesosy io vavolombelon̈o marin̈y ndreky tsy nivadiky tamy Jehovah. (Apokalypsy 3:14) Jesosy nampianatra olo an̈aran̈a Jehovah. Izy koa vavolombelon̈o nan̈ambara ny marin̈y mikasiky Zan̈ahary. (Jaona 17:6; 18:37) Kristianin̈y marin̈y zen̈y tsy maintsy mitondra an̈aran̈a Jehovah, ndreky mampianatra olo an̈aran̈a Jehovah. Tsisy ny hafa amy zen̈y raha ataonay Vavolombelon̈o Jehovah.

• Nan̈ino ma zahay nangala an̈aran̈a Vavolombelon̈o Jehovah?

• Rango ombian̈a ma nisiany Vavolombelon̈o Jehovah?

• Azovy ma Vavolombelon̈o Jehovah ten̈a niavaka?