Nûa támaa da gáa yɛ̂ɛ Ziova Ŋɔsêre-faa kɛ́-ɓelai káa a ɣâla-mɛni nina ta láa. Kɛ́ɛ, kóraŋ wala feerɛ polu ŋɔŋdɔ lɔ́ɔlɔ mɛi feerɛ (2,700) da bôlu aâ nâa tɛɛ, wɔlɔ-wɔlɔ tí Ziova nya kpîŋ è vɛli-ɓela tóli a “ŋɔsêre-ŋa” kpaa “ŋɔsêre-faa kɛ́-ɓela.” (Azaya 43:10-12) E lɛɛ la zu góraŋ 1931 e seri, da káa kú tóli a Ŋâla-kɔlɔ maa-kɔ́ri-ɓelai. Kɛ́ɛ, lé mɛni ɓé kú náai Ziova Ŋɔsêre-faa kɛ́-ɓelai siɣe lai?

Kúláa a Ŋâlai lɛ́ kwa vɛlii. Ŋwɔlɔ-wɔlɔ ɣâla-kɔlɔ-kpua-ŋai dí mò à gɛ́ɛ Ɣâla láa, Ziova è kɛ Ŋâla-kɔlɔi su a wala támaa (è kɛ pa serii 7,000 su). Ɣâla-kɔlɔ támaa su, bɔ̃yɛ-ɓela dí Ɣâla láa, Ziova, maa fáleŋ a Kúnuu-namui kpaa Ɣâla. Kɛ́ɛ, dɔ̃yâi Ɣâlai è náa kpɔ̂ɔ, Ziova, lɛ́ Môse ma nyɛɛi: “Ńáa ká ŋí wɔlɔ-wɔlɔ da wɔlɔ-wɔlɔ.” (Ɛsedɔ 3:15; NW) Bere sîi ŋí su, Ɣâla láa, Ziova, è ǹyaa da nɛɛ ɣâla-ŋai kélee loai laa. Gáa a kúlii-nɛ̃ɛ mɛni à gɛ́ɛ da kú tóli a Ziova Ŋɔsêre-faa kɛ́-ɓela.

Kúláa a kúkɛ́tii lɛ́. E siɣe Ebɛɛ ŋɔtãi ma e too kú tãi ma, nûa támaa dí dílaa-lai Ziova kponoi maa sêre-faa kɛ. Dí tani-ŋa ɓé kɛ́ a Nôa, Eɓerayɛ̃ɛ, Seela, Môse, Deeɓé da nûa támaa nyii Ŋâla-kɔlɔi è mò nyɛɛ dítinaŋɔɔ̂i a kwa yɛ̂ɛ “ɣele-kɔlɔŋ kole.” (Ibulu 11:4–12:1) Yɛ̂ɛ berei núu a sêre-faa kɛ la kôti su à gɛ́ɛ é núu da maa tɔ̃yâ ɓói, bere nɔ́ ɓé kwa Ziova maa sêre-faa kɛ la, kú kɛ́ m̀aa tɔ̃yâ ɓo.

Kwa Zîsɛ pɔ́ɔ-kɔɔŋ. Ŋâla-kɔlɔi è mò nyɛɛ Zîsɛ ɓa “Dɔ̃yâ-sêre-faa kɛ́-nuu sã́ai.” (M̀ɛni-lɛɛi 3:14) Zîsɛ nya kpîŋ è mò nyɛɛ, ‘ŋa íláai lɛ́ dîa’ nyaŋ è ŋɔ́nɔ ‘dɔ̃yâi maa-sêre-faa kɛ’ é pîlaŋ Ɣâla ma. (Zɔ̂ŋ 17:26; 18:37) Maa nɛ̂̃ɛi dɔ̃yâi Kôrai-ɓelai dí Ɣâla láai, Ziova, siɣe dí nɛ́ nûa dîa. Nyíŋi ɓé Ziova Ŋɔsêre-faa kɛ́-ɓelai da gɛ máŋ.

• Lé mɛni ɓé Ŋâla-kɔlɔ maa-kɔ́ri-ɓelai dí náai Ziova Ŋɔsêre-faa kɛ́-ɓelai siɣe lai?

• Mí tãi ɓé Ziova è pɛlɛ ŋɔnûai tóli la a ŋɔsêre-faa kɛ́-ɓelai?

• Gbɛ̂ɛ ɓa Ziova Ŋɔsêre-faa kɛ́-nuu kɛ́tɛi?