Épouô té nzaané é kwang nguè Ménjheuè-njiô Joovah si ngô lézeung tchôssi swhi. A ké ngô méngou’ 2 700 té nzapté, pa’ Ndem a lé zii yi a létông méghang-afa’ pi é lè “Ménjheuè-njiô.” (Isaïe 43:10-12) Épouô lè nzhè weuk pa’ wô Zi’nè Biible té ntshi ngou’ 1931. Lézeung tseuk é lé ping ntchi’ lè Ménjheuè-njiô Joovah mela’akô?

É si nghiitè gning yi Ndem weuk a wuè. Mè jiô lézeung Ndem a nteu mézwing mékèté Biible émi éfœu’ mvhô, tè é ghô ngueô méntsa’ té nzaa. A nteu mébiible té nzaa mi mè lé sèné, mbô mè lé koumnè kwa’ lézeung Ndem, éneung mézeung wou’té pa’ Ndi mbô Ndem. Téta’, kwa’ Ndem a lé tsui gning yi a wuè mé lézeung tsi, é tsi é lè Joovah, a mbou Moïse mbing ndeu nguè: ‘É si ngô lézeung tsa tsi é fou zôkô ghôô.’ (Exode 3:15) A lé tsia poup ndôk ntsui nguè a tswhi anè nkwa méleum tépông. Mpeukè si ngô mé lékak a léwè lézeung Ndem tsi é ndaané-laané.

É si nghiitè afa’ zeuk. Sissia nkang-a épouô éfœu’ mvhô pi é lé zii anè Abel yi a lè ndeung-ndeung, pô lé wuè aveung-è nteu a mbou Joovah, mbing shoung-ô anouneu anè yi. Méngou’ é lé nông ntôkô, Noé, Abraham, Sara, Moïse, David pô émô’ épouô é zeung nkouô zôp a nteu ‘mia nnô Ménjheuè-njiô’ wouô mèt. (Hébreux 11:4–12:1) Ndeung-ndeung pa’ ta’ njheuè-njiô a tôk nzeum gning yi mè kouô yi anou a mvhô akôt la, mpeukè pou nkia a légheu tè épouô é zhè anouneu anè Ndem weuk.

Mpeukè si fœu’nè Yésso. Biible a tông-ô yi é lè ‘Njheuè-njiô yi a ndeung-ndeung mbing ngwuè temtesèt.’ (Révélation 3:14) Yésso yingnwèt a lé leu nguè a “lé gheu tè épouô é zhè lézeung Ndem” mbing nzeung “nzi’nè wôp anouneu” anè Ndem. (Jean 17:26; 18:37) Éfhou poup, kwa’ mézingto Yésso é pôngtè wôp a léwè lézeung Joovah mbing nzi’né épouô a lézhè lézeung mèt. A si ngô ajoumi Ménjheuè-njiô Joovah é pou nkia a légheu.

• Wô Zi’nè Biible é lé ping ntchi’ é lè Ménjheuè-njiô Joovah mela’akô?

• Joovah a wè Ménjheuè-njiô pi a ndoo éssi atsetsa’ té fhou ésseung-è?

• Awô si ngô Njheuè-njiô Joovah té mô’é?