Batu bawombo beta muena ti Zimbangi zi Yehova didi dizina di dibundu dimosi dimona. Vayi, vamevioka 2700 yi mimvu, Nzambi yi kiedika wutedila bisadi biandi “zimbangi.” (Yesaya 43:10-12) Tii mu mvu 1931, tubetedolongo Minlongoki mi Bibila. Bila mbi tuyika tedolo Zimbangi zi Yehova?

Dizina beni dieta monisa Nzambi eto. Dizina di Nzambi, Yehova, dilembo monika mu maniskri ma thama ma Bibila mafunda ma zikhumbu. Mu zimbangudulu ziwombo zi Bibila, va buangu ki dizina beni, bametula zititre, mu mbonosono Mfumu voti Nzambi. Vayi, Nzambi yi kiedika wukimonikisa niandi veka kudi Moyize mu dizina diandi, Yehova, ayi wutuba phila yayi: “Diawu diodio dizina diama mu mvu ka mvu.” (2 Mose 3:15) Mu phila beni, wukisuasikisa kudi zi nzambi zioso zi luvunu. Tedolo mu dizina disantu di Nzambi yidi lukumu luwombo mu diambu di beto.

Dizina beni dieta monisa kisalu kieto. Tona kudi Abeli, mutu wukuikama, kuidi ayi ntanda wu batu ba thama bo basamuna ti beta wilukila Yehova. Ku manima ma mimvu, Nowa, Abalahami, Sala, Moyize, Davidi, ayi batu bankaka bakota mu ntanda wu “dituti dinene di zimbangi.” (Ebeleo 11:4–12:1) Bobuawu kuandi mutu keta vanina kimbangi ku tribinale mu diambu di mutu nioni kambulu bila, beto phe tuidi ayi luzolo lu tubila batu kiedika kitadidi Nzambi.

Mbonosono yi Yesu tuetalandakana. Mu Bibila, Yesu tedolo “mbangi yi kuikama ayi yi kiedika.” (Tsongolo 3:14) Yesu niandi veka ‘wutuba ti wutubila dizina di Nzambi’ ayi ‘wuvana thangu zioso kimbangi’ kitadidi Nzambi. (Yoane 17:26; 18:37) Diawu, minlongoki mikiedika mi Klisto bafueti tedolo mu dizina di Yehova ayi tubila batu dizina beni. Diawu diodio diambu Zimbangi zi Yehova beta tula ngolo badedikisa.

• Bila mbi Minlongoki mi Bibila bayika tedolo Zimbangi zi Yehova?

• Tona thangu mbi Yehova kadi zimbangi va ntoto e?

• Nani Mbangi yi Yehova nioni lutidi?