Yaʼab máakeʼ ku tuklikeʼ, le kʼaabaʼ u j-jaajkunajoʼob Jéeobaoʼ u kʼaabaʼ junpʼéel túumben religión. Baʼaleʼ maas tiʼ dos mil setecientos jaʼaboʼob bejlaʼeʼ, tiʼ le máaxoʼob u tsʼaamaj u yóol u meyajtoʼob Diosoʼ kʼaj óoltaʼaboʼob bey u ‹j-Jaajkunajoʼobeʼ› (Isaías 43:10-12). Táanil tiʼ u jaʼabil 1931, toʼoneʼ kʼaj óolaʼanoʼon kaʼach bey j-Xoknáaloʼob tiʼ le Bibliaoʼ. ¿Baʼaxten túun t-chʼaʼtuklaj k-kʼaabaʼintikba u j-jaajkunajoʼob Jéeoba?

Tumen ku yeʼesik máax k-Dios. Jeʼex u yeʼesik le úuchben tsʼíiboʼoboʼ, u kʼaabaʼ Dioseʼ, Jéeoba, lelaʼ u milesil u téenel ku chíikpajal teʼ Bibliaoʼ. Baʼaleʼ tiʼ yaʼab bibliaʼobeʼ tsʼoʼok u luʼsaʼal le kʼaabaʼaʼ utiaʼal u tsʼaʼabal le tituloʼob Yuumtsil wa Dios. U jaajileʼ le juntúuliliʼ jaajil Diosoʼ tu yaʼalaj u kʼaabaʼ tiʼ le máaxoʼob meyajt úuchjeakiloʼ, letiʼeʼ tu yaʼalaj: «Teen Yahveh [wa Jéeoba, NM], lelaʼ letiʼ in kʼaabaʼ» (Isaías 42:8). Bey úuchik u yeʼesik letiʼeʼ maʼ bey jeʼex u maasil diosoʼoboʼ. Toʼoneʼ jach nojoch baʼal k-ilik k-kʼaj óoltaʼal yéetel u kiliʼich kʼaabaʼ Dios.

Tumen ku yeʼesik baʼax meyajil k-beetik. Desde úuchjeakileʼ yaʼab máakoʼob tu tsʼáajoʼob ojéeltbil yaan u fejoʼob tiʼ Jéeoba; Abeleʼ letiʼe yáax máax bey tu beetiloʼ. Ka máan jaʼaboʼobeʼ yanchaj uláakʼ máakoʼob tʼaanajoʼob tu yoʼolal Dios jeʼex Noé, Abrahán, Sara, Moisés yéetel David, letiʼobeʼ ku keʼeteloʼob yéetel junpʼéel nuxiʼ múuyal (Hebreoʼob 11:4–12:1). Jeʼex juntúul testigo wa j-jaajkunaj ku yaʼalik u jaajil tu táan juntúul juez yoʼolal juntúul máak maʼ kʼasaʼaneʼ, toʼon xaneʼ tsʼoʼok k-chʼaʼtuklik k-tsʼáaik ojéeltbil u jaajil yoʼolal k-Dios.

Tumen táan k-beetik jeʼex Jesuseʼ. Le Bibliaoʼ ku yaʼalik Jesuseʼ letiʼ «le j-jaajkunaj chúukaʼan u yóol yéetel ku yaʼalik u jaajiloʼ» (Apocalipsis 3:14). Letiʼeʼ tu tsʼáaj kʼaj óoltbil u kʼaabaʼ u Taata yéetel tu yaʼalaj taal utiaʼal «tʼaan tu yoʼolal le jaaj» yaan yil yéetel Jéeobaoʼ (Juan 17:26; 18:37). Le oʼolal le máaxoʼob jach tu jaajil tsaypachtikoʼ, unaj u kʼaj óoltaʼaloʼob yoʼolal u kʼaabaʼ Jéeoba yéetel unaj u tsʼáaikoʼob ojéeltbil. Toʼon u j-jaajkunajoʼon Jéeobaeʼ letiʼe baʼax k-ilik k-beetik xanoʼ.

• ¿Baʼaxten t-chʼaʼtuklaj u xuʼulul k-kʼaj óoltaʼal j-Xoknáaloʼob tiʼ le Biblia utiaʼal k-kʼaabaʼintikba u j-jaajkunajoʼob Jéeoba?

• ¿Desde baʼax kʼiin káajak u yantal u j-jaajkunajoʼob Jéeoba way Luʼumeʼ?

• ¿Máax le maas nojoch j-Jaajkunaj tsʼoʼok u yantaloʼ?