Stale binni runi cré nacubi religión stiʼ ca testigu stiʼ Jiobá. Peru maʼ raca jma de chupa mil gadxe gayuaa iza de biree lá ca xpinni Dios ni dxandíʼ «testigu» stibe (Isaías 43:10-12). Binibiáʼcabe laadu casi ca Binni Ruundaʼ Biblia ante de iza 1931. Peru xiñee gudixhe íquedu guireʼ ladu testigu stiʼ Jiobá yaʼ.

Purtiʼ rusihuínnini tuu nga Dios stidu. Lá Dios nga Jiobá ne stale mil biaje rieeteʼ ni lu Biblia, nuu stale rollo nayooxhoʼ ni rusihuinni zacá ni. Ndaaniʼ stale Biblia maʼ guleecabe labe ne rucaacabe ni Señor o Dios. Peru Dios ni dxandíʼ gúdxibe Moisés Jiobá nga labe ne gúdxibe laa: «Ndiʼ nga laʼyaʼ ne qué ziuu dxi guinitilú ni» (Éxodo 3:15). Zacá bisihuínnibe maʼ gadxé laabe de ca dios ni cadi dxandíʼ. Ne nabé riéchedu chinedu lá Dios ni nandxóʼ.

Purtiʼ rusihuínnini xi dxiiñaʼ rúnidu. Dede dxi bibani Abel huayuu binni ni bisihuinni gupa fe Jiobá. Ra gudiʼdiʼ gayuaa de iza guyuu xcaadxi «binni ni bini cre Dios chiqué» casi Noé, Abrahán, Sara, Moisés ne David (Hebreos 11:4–12:1). Cásica rié binni de testigu nezalú ti juez para gusihuinni qué gapa tuuxa donda la? zacaca nga laadu, maʼ gudixhe íquedu guinidu ni dxandíʼ de Dios nezalú binni.

Purtiʼ rinándadu ejemplu stiʼ Jesús. Biblia na naca Jesús ti binni «ni qué rusiguii sínuque irá ni riníʼ la? jneza ni» o «ti testigu ni qué ruchee ne ni riníʼ puru si ni dxandíʼ» (Apocalipsis [Revelación] 3:14, TNM). Laapebe guniʼbe beeda gusiidibe binni lá Bixhózebe ne beedabe para güínebe «binni xii nga ni dxandíʼ» de Dios (Juan 17:26; 18:37). Nga runi, cani dxandíʼ xpinni Cristu naquiiñeʼ chinecaʼ lá Jiobá ne gusiidicaʼ ni binni. Ne laadu, ca testigu stiʼ Jiobá rúnidu stipa pur gúnidu zacá.

• Xiñee dxiqué bireʼ ladu ca Binni Ruundaʼ Biblia ne yanna maʼ ladu ca testigu stiʼ Jiobá yaʼ.

• Dede padxí bizulú gupa Jiobá Testigu stiʼ lu Guidxilayú riʼ.

• Tuu nga testigu stiʼ Jiobá jma risaca ni huayuu biaʼ dxi huabani binni.