Xidal buñ raluladx que testigos xtuny Jehová toib religión copy láani. Per diti scú nacní, portín ma más de chop mil gatzgayoʼ íz buñ ni bibany nírcu bisob ni ná Dios ni rasuidy xinésni, né bireʼ laayibu «testigos» (Isaías 43:10-12). Dzú yása guidxin íz 1931 góc laado buñ ni Bisuidy ni ná la Biblia. ¿Xigony gonido guireʼ laado testigos xtuny Jehová?

Portín raslooyni xí clas Dios rony adorardo. Laa Dios, Jehová, sieetni más de gatzmil buelt ló la Biblia, xomod raslooy guiich ni cuá ma xidzú íz. Ló xidal biblias diti cuátzay laa Dios, né xalagaryni cuá Señor o Dios. Per órni Dios ni rasuidy xinésni goniné Moisés, goníbu que laabu Jehová, né gochbu Moisés: «Ndeʼ laaya por tipzó» (Éxodo 3:15). Modreʼ bislooybu que diti nacbu xomod stipnés dioxh falz. Lóodo nigolú sacró rasacdo ni nédo laa Dios ni nayaa.

Portín raslooyni ni ronydo. Nírcu goyoʼ buñ ni goní xtiitz Dios, ni gosaló buny láani ngú góc Abel. Conforma godudy dzú Noé, Abrahán, Sara, Moisés, David né stipnés buñ goyoʼyibu lad ni rimbuno xomod «xcaay rodann testigos» (Hebreos 11:4–12:1). Xomod toib buñ ni riée nisló juez ni racné a toib buñ ni diti nap dool, scúca lóodo nóodo puext par guinido ni rasuidy Dios xtunydo.

Portín rasuʼdo Jesús. La Biblia rabeʼ laa Jesús «testigo ni rony xinésni né ni diti rascú» (Revelación 3:14). Láacabu goníbu que bisuidybu stipnés buñ laa Bixiosbu né bieedbu par guinibu nigolú de Dios (Juan 17:26; 18:37). Por ngú, buñ ni racanal láabu non tzanéyibu laa Jehová né guisuidyibu láani stipnés buñ. Ndeʼ xtem ni ronydo lóodo ni nacdo testigos xtuny Jehová.

• ¿Xigony buñ ni Bisuidy ni ná la Biblia bireʼ laayibu testigos xtuny Jehová?

• ¿Dada pu dzú ma nap Jehová testigos ló Gudxlio?

• ¿Chú láabu lagol lad testigos xtuny Jehová?