Bible no hyɛɛ nkɔm dɛ wɔ Christ no wu ekyir no, ator akyerɛkyerɛfo bɔsoɛr wɔ Christianfo a wodzi kan no mu na woeesi Bible mu nokwar no ne tsir adze. (Ndwuma 20:29, 30) Mber bi ekyir no, dɛm pɛpɛɛpɛr na osii. Wɔdze abosonsom nkyerɛkyerɛ bɔforaforaa Jesus ne nkyerɛkyerɛ no mu, na ɔnam iyi do maa ator Christiansom bae. (2 Timothy 4:3, 4) Yɛbɛyɛ dɛn agye edzi dɛ ndɛ yɛwɔ dza Bible no kyerɛkyerɛ ankasa no mu ntseasee a ɔyɛ nokwar?

Ber sõe dɛ Jehovah bɛda nokwar no edzi. Nyankopɔn hyɛɛ nkɔm dɛ, wɔ ‘ewiei ber no, [nokwar] nyimdzee bɔdɔɔ sõ.’ (Daniel 12:4) Wɔ afe 1870 mu no, nyimpakuw ketseaba bi a nna wɔrohwehwɛ nokwar no bohun dɛ nyamesom nkyerɛkyerɛ pii nngyina Kyerɛwnsɛm no do. Iyi ntsi wɔhyɛɛ ase hwehwɛɛ dɛ wɔbɛtse nokwar ankasa a ɔwɔ Bible no mu no ase, na Jehovah boaa hɔn ma wɔtsee Kyerɛwnsɛm no ase.

Akomapafo dze ahwɛyie hwehwɛɛ Bible no mu. Dɛm Bible Esuafo yi a wɔyɛ hɛn edzikamfo no, faa ɔkwan yi do sũaa Bible no: wɔfa asɛntsir bi a, nna wɔahwehwɛ no ho nsɛm nyinara wɔ Bible no mu; na sɛ wohyia Bible mu asɛm bi a n’ase tse yɛ dzen a, nna wɔahwehwɛ Kyerɛwnsɛm no n’afã ahorow a ɔkyerɛkyerɛ mu no mu; sɛ wohu dɛ hɔn ntseasee nye Kyerɛwnsɛm no n’afã ahorow hyia a, nna wɔakyerɛw ato hɔ. Dɛm kwan yi ara na yɛfa do sũa Bible no ndɛ. Osiandɛ wɔmaa Bible no ankasa kyerɛɛ no ho mu ntsi, wobohun nokwar a ɔfa Nyankopɔn ne dzin, n’Ahendzi nye ne tsirmpɔw a ɔwɔ ma adasamba na asaase no ho. Bio so, nokwar a ɔfa tsebea a ewufo wɔ mu nye wunyan ho enyidado so bɛdaa edzi. Nokwar yi a wɔhwehwɛe no maa wɔbɛyɛɛ adehye, kyerɛ dɛ wodzii hɔn ho fir ator nkyerɛkyerɛ nye ne ndzeyɛɛ ho.​—John 8:31, 32.

Obodur afe 1879 mu no, Bible Esuafo no bohunii dɛ ber aso dɛ wɔbɛma nokwar no atserɛw akɔ wiadze beebiara. Ntsi wɔ dɛm afe no mu no, wɔhyɛɛ ase tsintsiim magazine yi; The Watchtower Announcing Jehovah’s Kingdom, na wɔda ho ara tsintsim no ndɛ. Seseiara, yɛrekã Bible mu nokwar no kyerɛ nkorɔfo wɔ nsaase 240 do wɔ kasa ahorow bɛyɛ 750 mu. Nokwar nyimdzee nndɔɔ sõ dɛm da!

• Wɔ Christ no wu ekyir no, ebɛnadze na ɔbaa Bible mu nokwar no do?

• Ebɛnadze na aboa hɛn ma yɛasan ehu nokwar a ofi Nyankopɔn Asɛm mu no bio?