Bup Kudus madahka, pengudah pemati Kristus, pengajar ti pelesu deka pansut ari orang Kristian ke bendar lalu nyarutka pemendar ari Bup Kudus. (Kereja Rasul 20:29, 30) Nyau kelama, utai tu amat nyadi. Pengajar ti pelesu tu nyampurka ajar Jesus enggau pengarap ti pelesu. Sida iya ngaga pengarap ti baru ke enda sama enggau ajar asal Jesus. (2 Timoti 4:3, 4) Kemaya hari tu, baka ni kitai tau arap kitai bisi penemu ti bendar pasal ajar ari Bup Kudus?

Maya Jehovah madahka pemendar. Daniel madahka, maya “pengujung dunya,” penemu ti bendar deka belimpah. (Daniel 12:4) Ba taun 1870, seraban mit orang ke ngiga pemendar ulih beratika ajar ba mayuh gereja enda sama enggau ajar Bup Kudus. Nya alai, sida iya belabuh ngiga ajar Bup Kudus ti asal, lalu Jehovah merekat sida enggau ajar ke betul.

Orang ke lurus ati bejimat mansik Bup Kudus. Nembiak Bup Kudus ke lurus ati tu belajar ngena chara ke agi dikena kami kemaya hari tu. Sida berandauka penemu Bup Kudus ari siti pekara ke siti pekara. Maya sida tetemuka ayat ti tusah, sida manding ngena ayat ke bukai kena nerangka ayat nya. Udah sida tetemuka reti ayat nya, sida nuliska nya. Sida nerangka ayat Bup Kudus ngena Bup Kudus empu. Ketegal tu, sida tetemuka baru pemendar pasal nama Petara, Perintah Petara, tuju Iya ke mensia enggau dunya, penyadi ngagai orang ke udah mati sereta peluang orang mati ke deka diidupka baru. Pemendar ke udah ditemu ari Bup Kudus ngelepaska sida ari mayuh penemu enggau pengawa ti pelesu.—John 8:31, 32.

Kenyau ari taun 1879, Nembiak Bup Kudus nemu pemendar tu patut dipadah ngagai semua orang di serata dunya. Ba taun nya mega, sida berengkah ngaga majalah ke dikena kitai nyentuk ke seharitu, Menara Jaga Meritaka Perintah Jehovah. Diatu kami bekunsika pemendar ari Bup Kudus enggau semua orang ba 240 iti menua dalam lebih ari 750 iti bansa jaku. Nadai kala penemu ti bendar ngemayuh tu!

• Pengudah Kristus mati, nama penyadi ngagai pemendar pasal Bup Kudus?

• Nama utai ulih nulung kitai tetemuka baru pemendar pasal Jaku Petara?