Hkristu si mat ai hpang Hkristan ni hta shut shai ai sharin achyin ai ni hte Chyum Laika teng man ai lam hpe jahten ai ni paw pru wa na nga nna, Chyum Laika hta tau hkrau tsun da ai. (Kasa 20:29, 30) Tsun ai hte maren byin wa ai. Shanhte gaw Yesu a sharin achyin ai hpe shut shai ai nawku htung ni hte kayau kau nna, shut shai ai Hkristan nawku htung byin pru wa hkra galaw ai. (2 Timohti 4:3, 4) Ya aten hta anhte chye da ai lam gaw Chyum Laika a teng man ai lam re ai, nre ai hpe gara hku chye lu na ta?

Teng man ai lam hpe Yehowa hpaw madun na aten du wa ai. Jahtum nhtoi re ai “amu htum ai aten” hta “nyan hpaji jat wa na ra ai” nga nna shi tau hkrau tsun da ai. (Daniela 12:4) 1870 ning hta, teng man ai lam hpe sawk tam ai hpung kaji gaw, nawku htung law law a sharin ya ai lam ni gaw Chyum Laika hte nhtan shai ai hpe chye wa ma ai. Dai majaw Chyum Laika teng sha sharin ya ai hpe tam hpang wa ai. Shanhte shakut ai lam hpe Yehowa shaman chyeju jaw ai.

Ding man ai ni gaw Chyum Laika hpe atsawm sha hkaja ma ai. Shakut shaja ai moi na Chyum Jawng Ma Ni a hkaja ai ladat hpe, ya aten du hkra anhte jailang nga ai. Shanhte gaw lam langai hpra hpe bawngban ma ai. Chye na yak ai Chyum daw ni hpe mu yang, dai hpe sang lang dan na matu kaga Chyum daw ni hpe sawk tam ai. Chyum Laika a kaga daw ni hte htap htuk sai nga yang, dai hpe ka matsing da ai. Dai hku galaw nna, Karai Kasang a amying ningsang hte Mungdan a lam; mungkan ga hte shinggyim masha ni hte seng ai shi a yaw shada lam; si mat ai ni a mabyin masa hte bai hkrung rawt na myit mada lam ngu ai Chyum Laika teng man ai lam ni hpe bai tam shapraw ma ai. Shanhte dai hku hkaja ai majaw shut shai ai kamsham lam, htung lai len ni kaw na lawt wa ma ai.​—⁠Yawhan 8:31, 32.

1879 ning hta Chyum Jawng Ma Ni gaw teng man ai lam hpe chyam bra hkra galaw na a ten du sai ngu chye wa ma ai. Dai shaning kaw nna Sin Langchyi Yehowa A Mungdan Hpe Ndau Shabra Ai Lam ngu ai magazine hpe dip shabra wa ai gaw ya aten du hkra re. Ya aten hta Chyum Laika a teng man ai lam hpe mungdan 240 hta, ga amyu baw 750 jan hte dip shabra nga ai. Teng man ai lam dai daram chyam bra ai gaw kalang pyi n nga ga ai.

• Hkristu si mat ai hpang Chyum Laika a teng man ai lam hpa byin mat a ta?

• Chyum Laika a teng man ai lam gara hku bai paw pru wa ai kun?