Kja ne Biblia mi mama pje ro kjogꞹ ma ro nrru̱u̱ e Cristo, mi mama ke kja o discípulo e Cristo ro bʼꞹbʼꞹ bʼɇzo ke ro dyompꞹji yo ntee, dya kja ro jichiji kʼo ma kjuana ja ma nee e Mizhokjimi (Hechos 20:29, 30). Je ba kjanu ba tsjaji, kʼua ja ma kjaa kʼꞹ ma ngijñiji nge kʼo mi jichiji kʼo ntee, xo mi jichiji kʼo mi kreo yo ntee kʼꞹ dya mi matrʼꞹji Mizhokjimi. Mi manji mi kjaji kʼo mi mama e Mizhokjimi, pe dya mi jichiji kʼo na kjuana kʼo mi mama o jñaa e Mizhokjimi (2 Timoteo 4:3, 4). Je ba kjanu kʼꞹ ba kjogꞹ, pe nudya, ¿pjekja yo ri testigojme e Jehová ri mangojme ke bʼemi ri pa̱rgojme pje mama ne Biblia?

E Jehová go mbøsʼꞹ bʼɇzo ngekʼua ro mba̱ra̱ji kʼo na kjuana. Mi jingua e Mizhokjimi go mama ke yo paa yo ri bʼꞹnjidya ro bʼꞹbʼꞹ ntee ke ro xørꞹji ne Biblia, ro mba̱ra̱ji pje nee ra mama kʼo junsʼꞹnu (Daniel 12:4). Kja kʼe kjɇɇ 1870, o bʼꞹbʼꞹ bʼɇzo ke mi nee ro mba̱ra̱ji pje mama ne Biblia, pe go unꞹji nguenrra ke kja o nitsjimi ja mi poji dya mi jichiji kʼo ma kjuana. Kjanu go jmurꞹji go xørꞹji o Biblia, e Jehová go mbøsʼꞹkʼo ngekʼua ro mba̱ra̱ji ja ma kjaa kʼo mi xørꞹji kja Biblia.

O bʼꞹbʼꞹ bʼɇzo kʼo mi xørꞹji ja ma kjaa kʼo mama ne Biblia. Angezeji mi kjaji na punkjꞹ trʼønꞹ, mi jodʼꞹji kʼo mi mama ne Biblia, kjanu mi junsʼꞹji kʼo mi tøtrʼꞹji. Ma mi bʼꞹbʼꞹ dʼa texto kʼꞹ dya mi pa̱ra̱ji pje mi nee ro mama, mi sido mi xørꞹji ne Biblia jesta ma mi tøtrʼꞹji texto kʼꞹ ro mbøsʼꞹji ro tendioji na joo. Ga kjanu go mba̱ra̱ji pje ni chju̱u̱ e Mizhokjimi, pje ngeje o Reino, pje ra tsjaa kja ne Xoñijomꞹ, o mba̱ra̱ji ja bʼꞹbʼꞹ kʼo ya nrru̱u̱ ñe ke e Jehová ra xosꞹ kʼo ya nrru̱u̱. O unꞹji nguenrra kʼꞹ ma joo ke ro xørꞹji ne Biblia, ga kjanu ro mba̱ra̱ji kʼo na kjuana, dya kja ro tsjaji kʼo ma sʼoo ñe dya kja ro kreoji kʼo dya ma kjuana. Nudya, yo ri testigojme e Jehová ri xørꞹjme ne Biblia kʼua ja ma tsjaji angezeji (Juan 8:31, 32).

In kjuarmagojme go unꞹji nguenrra ke ma joo kʼo ma pjechiji, xo go unꞹji nguenrra ke ma joo ma ro jichiji kʼo ntee pje mi mama ne Biblia, nu kjɇɇ 1879 nge ma go mbꞹrꞹji go tsjajikʼo. Kʼe kjɇɇ go mbꞹrꞹji go pjongꞹji kʼe skuama: La Atalaya. Anunciando el Reino de Jehová. Ndizi kʼe kjɇɇ asta yo paa yo ri ka̱ra̱jidya, yo ri testigojme e Jehová ri jichigojme yo ntee kja dosciento cuarenta país ñe seteciento cincuenta idioma. Ri ka̱ra̱jme nrrexe kja ne Xoñijomꞹ, ri pjøsʼꞹjme yo ntee ngekʼua ra mba̱ra̱ji kʼo na kjuana.

• Ma go nrru̱u̱ e Cristo, ¿pje nge kʼo na sʼoo kʼo go tsjaji kʼo bʼɇzo kʼo mi dyoji ko o discípulo e Cristo?

• ¿Pje go tsjaji yo in kjuarmagojme ngekʼua o mba̱ra̱ji kʼo na kjuana?