Biblia kijtoj iga después ke mikiskiá Cristo, pan tanechko̱lis kisaskiáj yej kine̱xtiskiáj takajkaya̱walis wan kipataskiáj yej kijtowa Itajto̱l Dios (Hechos 20:29, 30). Wan ijkó̱n panoj: iní̱n tajta̱gamej kinelojkej (o kise̱tilijkej) itamachtilis Jesús wan tamachtilismej yej kine̱xtiayaj pan seuʼmej religiones wan ki̱saʼ se̱ religión yej mopantia̱ya ken yej melá̱ (2 Timoteo 4:3, 4). Inó̱n iga, ¿kén tikmatij iga yej a̱man tikojasij o tigikpaasij inó̱n yej melá̱ kine̱xtiá Biblia?

Jehová kineʼ iga mamomati yej melá̱. Dios kijtoj iga pan itamilis tiempoj ‹komatimej kiye̱ʼixmatiskej Itajto̱l Dios› (Daniel 12:4). Pan 1870, sekin yej kimatisnekiáj yej melá̱, kitakej iga miak religiones ayá̱ tamachtia̱yaj ken kijtowa Itajto̱l Dios. Inó̱n iga momachtijkej yej melá̱ kijtowa Itajto̱l Dios, wan Jehová kipale̱wij iga makimatikan yej melá̱.

Sekin tajta̱gamej moye̱ʼmachtijkej Biblia. Yej moto̱ka̱wia̱yaj yej Momachtiáj Biblia momachtia̱yaj ijko̱nsan ken tejeme̱n tikchi̱waj a̱man: achto kojasiáj se̱ tamachtilis wan de ompa momachtia̱yaj seuʼ. Kua̱ akojasiáj se̱ texto pan Biblia, momachtia̱yaj seuʼmej textos yej makipale̱wi̱kan makojasikan, kua̱ nochimejya kojasiáj ken kijtowa Itajto̱l Dios kijkuilowa̱yaj. Wan ijkó̱n kikajtejkej iga ise̱lti Biblia makine̱xti te̱ kijto̱sneki ito̱ka̱ Dios wan Irreinoj. Wan kimatikej te̱ yawi pano̱ti wan tajta̱gamej wan iní̱n ta̱jli, te̱ panowa kua̱ timikij wan si wel isaskej seuʼ biáj yej miktokej. Yej momachtijkej pan Itajto̱l Dios kichij iga ayoʼ mamokajkaya̱wakan de tamachtilismej yej aye̱kti wan de sekin tejté̱ yej miakej kichi̱wayaj ( Juan 8:31, 32).

Pan 1879 kojasikej iga asiʼya tiempoj iga makijto̱kan yej melá̱ pan nochi ta̱jli. Pan ino̱nsan xiwiʼ kiki̱xtijkej a̱matajkuilo̱l yej hasta a̱man tiknentiáj: La Atalaya. Anunciando el Reino de Jehová. A̱man tikne̱xtiáj yej melá̱ kijtowa Itajto̱l Dios pan ma̱j de doscientos cuarenta pai̱smej wan a̱ltepe̱mej wan pan ma̱j de setecientos cincuenta tajto̱lmej. ¡A̱man nemi momati yej melá̱ de Itajto̱l Dios ken nike̱man áya momatiá!

• ¿Te̱ panoj wan yej melá̱ kine̱xtiá Itajto̱l Dios después ke mik Jesucristo?

• ¿Kén tikmatikej seuʼ biáj yej melá̱ kine̱xtiá Itajto̱l Dios?