بائبل وچ پہلے توں دسیا گیا سی کہ یسوع مسیح دی موت توں بعد سچے مسیحیاں وچوں ای جھوٹھے استاد اُٹھ کھلون گے تے پاک کلام دیاں سچائیاں نُوں توڑ مروڑ کے سکھاؤن گے۔‏ (‏اعمال 20:‏29،‏ 30‏)‏ وقت گزرن دے نال نال ایہہ گل بالکل سچ ثابت ہوئی۔‏ اوہناں استاداں نے یسوع مسیح دی تلیم وچ جھوٹھیاں گلاں دی ملاوٹ کر دِتی۔‏ ایس طرحاں مسیحی کلیسیاواں وچ جھوٹھی تلیم ودھن لگ پئی۔‏ (‏2-‏تیمُتھیُس 4:‏3،‏ 4‏)‏ اَسی کیویں یقین کر سکنے آں کہ اَسی بائبل دی تلیم نُوں صحی طرحاں سمجھنے آں؟‏

وقت آؤن تے یہوواہ خدا نے سچائی توں پردہ ہٹایا۔‏ خدا نے پہلاں ای دسیا سی کہ اخیر زمانے وچ سچا علم ودھے گا‏۔‏ ‏(‏دانی‌ایل 12:‏4‏)‏ سن 1870ء وچ سچائی دی تلاش کرن والے مسیحیاں دے اِک چھوٹے جہے گروہ نے ایہہ سمجھ لیا کہ چرچاں دی زیادہ‌تر تلیم بائبل دے مطابق نئیں۔‏ ایس لئی اوہناں نے بائبل دیاں سچائیاں بارے تحقیق کرنی شروع کر دِتی تے یہوواہ خدا نے پاک کلام دیاں گلاں نُوں سمجھن چ اوہناں دی مدد کیتی۔‏

نیک‌دل بائبل سٹوڈنٹس نے بڑے دھیان نال پاک کلام دیاں سچائیاں بارے تحقیق کیتی۔‏ بائبل سٹوڈنٹس نے پاک کلام نُوں سمجھن دا ایسا طریقہ اپنایا جیہڑ‌ا اَسی اَج وی استمال کرنے آں‏۔‏ اوہ بائبل دے عقیدیاں تے اِک اِک کر کے غور کر دے سن۔‏ جدوں اوہناں نُوں کسے عقیدے بارے کوئی گل سمجھ نہ آؤندی تے اوہ دُوجیاں ایتاں وچوں تحقیق کردے سن۔‏ اوہ اِک عقیدے بارے بائبل دیاں ساریاں ایتاں تے غور کردے سن۔‏ اِنج اوہ نتیجہ کڈھدے سن کہ اصل وچ ایس عقیدے بارے بائبل دی تلیم کیہہ اے تے فیر اوہ ایس نتیجے نُوں لکھ لیندے سن۔‏ اوہ بائبل نُوں سمجھن لئی بائبل دی مدد لیندے سن۔‏ ایس طرحاں اوہ خدا دے ناں،‏ اوہدی بادشاہی،‏ انسان تے زمین لئی اوہدے مقصد‏،‏ مُردیاں دی حالت تے اوہناں دے زندہ ہون بارے سچائی جانن دے قابل ہوئے۔‏ ایس تحقیق دی مدد نال اوہ کئی جھوٹھے عقیدیاں تے رسماں دے نھیرے وچوں نکل آئے۔‏—‏یوحنا 8:‏31،‏ 32‏۔‏

سن 1879ء تک بائبل سٹوڈنٹس سمجھ گئے کہ ہُن اوہ گھڑی آ گئی اے کہ سچائی دی روشنی ہر پاسے پھیلائی جائے۔‏ ایس لئی اوسے سال اوہناں نے اِک رسالہ چھاپنا شروع کیتا جیہڑ‌ا حالے تک چھپ رہیا اے۔‏ ایس رسالے دا ناں ‏”‏مینارِنگہبانی“‏ اے۔‏ اَج اَسی تقریباً 750 زباناں وچ 240 مُلکاں دے لوکاں نُوں بائبل دیاں سچائیاں سکھا رہے آں۔‏ واقعی سچائی دا چانن پہلے توں کِتے زیادہ پھیل رہیا اے۔‏

• یسوع مسیح دی موت توں بعد پاک کلام دیاں سچائیاں نال کیہہ ہویا؟‏

• بائبل دیاں سچائیاں توں پردہ کیویں ہٹایا گیا؟‏