Bibliapica nircami, Jesús huañushca jipaca Jesuspa catijcunapuramandallatami pandata yachachijcuna ricurishpa Diospa Shimimanda llullacunata yachachinga nishpa (Hechos 20:​29, 30). Paicunami Jesuspa yachachishcacunataca panda yachachishcacunahuan chapurca. Shinami Jesusta catinchi nij tucushcacuna tiai callarirca (2 Timoteo 4:​3, 4). Shinaca, Bibliapa yachachishcacuna panda yachachishcacunahuan na chapurishca cajtaca ¿imamandata seguro capanchi?

Bibliapa na llulla yachachishcacunata intindina tiempomi chayarca. Bibliapica nircami, tucuri punllacunapica Diosmanda ali ‘yachajuicunapash ninandami miranga’ nishpa (Daniel 12:4). Huata 1870pica iglesiacuna Bibliamanda na cabalta yachachinajujtami Bibliamanda Yachajujcunaca cuenta japirca. Paicunaca Bibliapa na llulla yachachishcacunata intindingapami esforzarirca. Chaicunata intindichunmi Diosca paicunata ayudarca.

Ali shungu jaricunami Bibliata ali yachajurca. Testigo de ­Jehovacunatami Bibliamanda Yachajujcuna nishpa rijsin carca. Paicunaca shuj temata agllashpami Biblia imata yachachijta ricun carca. Shuj textota na intindishpaca shuj textocunata mascashpami ali intindin carca. Bibliapa yachachishcacunata ali intindishca jipaca escribinmi carca. Shinami Bibliallata ayudarca Diospa shutita, Diospa Reinota, gentecuna aliguta causachun cai Alpata Dios imata ruranata, gentecuna huañushpa ima tucujta, huañushcacuna causarinatapash ali intindichun. Bibliapa na llulla yachachishcacunata ali intindishpami nali ruraicunapi, panda yachachicunapipash ña na chapurirca (Juan 8:​31, 32).

1879pica tucui ladocunapi Bibliamanda villachina cashcatami intindirca. Chai huatapillatami, cunangaman llujshijuj Jehová Diospa Reinomandami Villajun revistata rurai callarirca. Cunanbica 240 llactacunapi, 750 yali idiomacunapimi Bibliapa na llulla yachachishcacunataca villachinajupanchi. Chaimi tucui ladocunapi villachinajushcata ricuchin.

• Jesús huañushca jipaca, Bibliapa yachachishcacunahuanga ¿imata pasarca?

• ¿Imashinata Bibliapa na llulla yachachishcacunataca intindi callarircanchi?