Na valoia e te Tuhi Paia kāfai e mavae te maliu o Keliho, ka aliali ake nā faiākoga hehē mai nā Kelihiano muamua ma fakahehē te kupu moni o te Tuhi Paia. (Galuega 20:​29, 30) Mulimuli ake, ko te mea tonu tēnā na tupu. Kua ki latou palu fakatahi nā akoakoga a Iehu ma nā manatu mai nā lotu fakapaupau, ma tutupu ake ai ni Kelihiano e hē moni. (2 Timoteo 4:​3, 4) E mafai vēhea oi mautinoa ki tatou e hako tō tatou malamalamaga ki nā akoakoga moni mai te Tuhi Paia?

Kua pa ki te taimi a Ieova e fakaali ai te kupu moni. Na ia valoia mai i ‘te taimi o te ikuga ka fakalauiloa ai te poto hako.’ (Tanielu 12:4) I te 1870, na matea e he vaega taigole e hakili te kupu moni ko te lahiga o nā talitonuga o nā lotu e hē Faka-Tuhi Paia. Ko tēia lā, na kamata a latou hakilikiliga mo he malamalamaga o te akoakoga muamua a te Tuhi Paia, na fakamanuia ki latou e Ieova i te mauagia o te malamalama fakateagaga.

Na hukehuke ma te fakaeteete e nā tāne fakamāoni te Tuhi Paia. Ko nā Tino Ākoga māelegā o te Tuhi Paia, ko ki latou na muamua hakili te faiga o nā hukehukega e fakaaogā pea e ki matou i nā aho nei. E ki latou talanoa tēia matakupu ki tēia matakupu mai te Tuhi Paia. Kāfai na tau atu ki latou ki he mau mai te Tuhi Paia e faigatā ke malamalama ki ei, e toe kikila ki latou ki iē tahi fuaikupu ke fakamatala mai ai. Kāfai na fetaui lelei ma iē tahi Tuhituhiga Paia, oi tuhi loa ki lalo te latou fakaikuga. Tēia la, na fakaaogā te Tuhi Paia ke fakamalamalama ia lava, kua ki latou toe maua ai te kupu moni e uiga ki te igoa o te Atua ma tona Mālō, tana fuafuaga mo nā tino uma ma te lolalogi, te tulaga o ki latou kua feoti, ma te fakamoemoe mo te toetū. Ko te latou hakilikiliga kua fakahaoloto ai ki latou mai te lahiga o nā talitonuga hehē ma nā mea nae latou faia.​—Ioane 8:​31, 32.

I te 1879 na malamalama ai nā Tino Ākoga o te Tuhi Paia kua pa ki te taimi e fakailoa atu ai te kupu moni ki te tokalahi. I te tauhaga lava tēnā, na kamata lōmia ai te mekahini e koi lolomi pea e ki matou i nā aho nei, ko The Watchtower Announcing Jehovah’s Kingdom. I te taimi nei e tufa atu e ki matou te kupu moni o te Tuhi Paia ki nā tino e hili atu i te 239 fenua ma e ova atu i te 700 gagana. Kua lahi te poto moni i te taimi nei i lō muamua!

• He ā na tupu ki te kupu moni o te Tuhi Paia i te mavae o te maliu o Keliho?

• Ko he ā na fehoahoani mai ki a te ki matou ke toe maua te kupu moni mai te Kupu a te Atua?