OZUMALƐDƖYƐ 4
Mɩnla Ti Mɔɔ Yɛyɛ New World Translation Bayɩbʋlʋ Yɩ a?
Congo (Kinshasa)
Rwanda
Symmachus ɛhɛlɛlɛ sini mɔɔ Nyamɩnlɩ yi dima mɔɔ ɩwɔ Psalm 69:31 igua ɔzʋlɔ nɩ, wɔ alʋbɔ yaalɛ mɔɔ ɩtɔ ɔzʋlɔ asã anzɛnyɩɩ anla yɛ mmɩlɩ nu
Wɔ alʋbɔ sʋ̃maa mɔɔ ɩɣa ɩzɩ ɩhɔ nɩ, Gyehova Dasɩvʋlɔmaa bɛvalɩ Bayɩbʋlʋ azʋlɔtʋ belili egyima, bedindiminli, na bɛhyɩhyɛlɩ ebiye sʋ̃. Naasʋ̃ yɛnwʋlɩ yɩ kɛɛ, ihyinyia kɛɛ yɛyɛ Bayɩbʋlʋ fʋlɔ mɔɔ ɩkɔwʋwa paa ma mmenii kozuma “ehilehilelɛ baaba nɩ” mɔɔ ɩdɩ Nyamɩnlɩ yɩ pɛ kɛɛ abiyela nyia nɩ. (1 Timoti 2:3, 4) Meti, wɔ 1950 nu nɩ, yɛwɔlɩ yɩ tʋ yɛyɩlɩ New World Translation Bayɩbʋlʋ yɩ ɔfʋã azʋlɔtʋ be wɔ nnɛ ɛdɩndɛlɛ nu. Bɛvalɩ nɔhʋanlɛlilɛ behileli Bayɩbʋlʋ eyi yɩ tʋ na bɛhɛlɛlɩ yɩ pɛpɛɛpɛ wɔ ɛdɩndɛlɛ mɔɔ ɩbʋ 120 nu.
Nɩ yehyinyia Bayɩbʋlʋ mɔɔ yɩ tʋ dɩlɛ ɩáyɛ ɛzɩzɩbɛ. Mmɩlɩ ɩkɔ ɔzʋlɔ nɩ, ɛdɩndɛlɛ ɩsɩnza, na ndwokɔ abɔkɔ mɔɔ bɛvalɩ bɛhɛlɛlɩ Bayɩbʋlʋ azʋlɔtʋ be wɔ ɛkɛnɩ a, numɔ ɩála ɛkɛ anzɛnyɩɩ ɩba ɔnwʋmɔ, na eyi ɩma ɩyɛ ɛzɩzɩbɛ kɛɛ yɛkɛdɩ yɩ tʋ. Akʋ̃ sʋ̃, bɔnwʋnlɩ ɔwɔkɩ Bayɩbʋlʋ salɛti ɛhɛlɛlɛ be mɔɔ ɩdɩ pɛpɛɛpɛ na ɩnɩ mɔɔ belili bɔmʋnlɩ bɛhɛlɛlɩ yɩzayɩ yiyia, eyi ɩmanlɩ bɛdɩlɩ Hibulu, Alamɩkɩ, nɩɩ Giliki Bayɩbʋlʋ ɛhɛlɛlɛ yɩ ɩtʋ bʋwɔ paa.
Nɩ yehyinyia Bayɩbʋlʋ mɔɔ ɩda Nyamɩnlɩ yɩ odwokɔ ali pɛpɛɛpɛ. Kɛ ankɩ bɛkɛzɩnza anzɛnyɩɩ bɛkɛyɩ odwokɔ pɔkɔ be wɔ Nyamɩnlɩ yɩ Ɛhɛlɛlɛ Nwanzanwanza nu nɩ, ɩsɛ kɛɛ Bayɩbʋlʋ ɩtʋhilelɛmaa bɛfa nɔhʋanlɛlilɛ bɛkɛlɛ ɛhɛlɛlɛ nɩ yɩzayɩ. Naasʋ̃, wɔ Bayɩbʋlʋ sʋ̃maa zɛ nu nɩ, bɛáfa Nyamɩnlɩ yɩzayɩ dima, Gyehova yɩ nɩ bedi egyima wɔ Ɛhɛlɛlɛ Nwanzanwanza nɩ nu.
Nɩ yehyinyia Bayɩbʋlʋ mɔɔ ɩhyɛ Ɩhɛlɛlɛvʋlɔ nɩ animinyiamɩ. (2 Pita 1:20, 21) Wɔ New World Translation nu nɩ, bezia bɛva dima Gyehova beli egyima wɔ dɩka mɔɔ ifinde pɛpɛɛpɛ wɔ ɔwɔkɩ Bayɩbʋlʋ salɛti ɛhɛlɛlɛ yɩ nu kɛyɛ 7,000, dɩkɛ mɔ mfonyini mɔɔ ɩwɔ azɩ ɛkɩhyɩ ikile nɩ. (Psalm 83:18, NW) Mɩnla yɛɛ ɩzʋ̃ alʋbɔ sʋ̃maa mɔɔ bɛva bɔwɔlɩ mmɔdɩnɩ bɛbɩbɛlɩ Bayɩbʋlʋ eyi nu ɩɣa a? Ɩma Bayɩbʋlʋ eyi ɩɣɩnganlɛ ɩyɛ anyɩnlɩlelɛ, iluwakɛɛ ɩda Nyamɩnlɩ yɩ adwɩnɩ ali bʋwɔ. Sɛ ɔwɔ New World Translation yɩ be wɔ wʋ ɛdɩndɛlɛ nu o, sɛ ení ebiye o, yɛhyɛ wʋ ɛzɩzɩbɛ kɛɛ ɛkɛyɛ nhyɩhyɛlɩyɛ baaba mɔɔ ɩkɔwʋwa wʋ ma ɛkɛɣɩnga Gyehova yɩ Odwokɔ nɩ eɣile bela.—Egyima 17:11.
-
Mɩnla ti mɔɔ yezili pɔkɔ kɛɛ yehyinyia Bayɩbʋlʋ ɩtʋhilelɛ fʋlɔ a?
-
Mɩnla nhyɩhyɛlɩyɛ baaba yɛ ɩsɛ kɛɛ abiyela mɔɔ ɩpɛyɩ kɛɛ isuma Nyamɩnlɩ yɩ apɛdɩ nɩ ɩyɛ a?
