Wɔ̃ɔ dabi dabinu sɔɔ, bɛsɛ Yehofan Seeda Diobu, sa raa Bibelin tusia dabinu loo kua, ma sa nin dabinu yara su ka ni bɔnu ko. Adama yen biru, sa wa ma n de n tura su Bibelin tusia kpaaru yara, te ta koo tɔmbu somi bu ka kpĩ bu yɛ̃ru sosi, nge mɛ n sãa Gusunɔn kĩru tɔmbu kpuro sɔɔ. (1 Timɔte 2:3, 4) Mɛna 1950 sɔɔ, sa Bibelin tusiaru garun bɔnu yaran torua. Tusia te, sa te soka Traduction du Monde Nouveau ka faransem, ta yoruawa tɛ̃n wãarun gari yara sɔɔ. Sa tusia te yoruawa dee dee ma sa Yori Gbiikin swaa swĩi mam mam. Tusia te, ta raa yara barum nge 130 ka sɔndiru sɔɔ.

Tɔn ba Bibeli ye ya kun tubum sɛ̃n bukata mɔ. Barum gari yara ya ra n kɔsimɔ saa ka saa, yen sɔ̃ Bibelin tusia dabira tubum sɛ̃sia. Ye baasi, ba Yori Dɛɛrin tire kɛ̃ki yi ba raa yorua n tɛ kamɛ, tire kɛ̃ki dabi ni, nu ka Heberum, ka Aramum ka maa Gɛrɛkim yori gbiiki turuku sãa. Mɛna sa ka Bibelin garin asansi tuba.

Tɔn ba Bibelin tusia te ta koo Gusunɔn gari yara dee deen bukata mɔ. N weenɛ Bibelin tusiaru ta n mwaanɛ ka yori gbiiki, n ǹ weenɛ be ba ra ye tusie bu de ben tiin bwisikunu nu tera Gusunɔn Yori yi ba yorua ka hunde dɛɛran dam sɔɔ. Wee, Yori Dɛɛrin tusia dabinu sɔɔ, Gusunɔn yĩsiru, Yehofa, sari!

Tɔn ba Bibeli ye ya koo yen Yɛ̃ro yiiko wɛ̃n bukata mɔ. (2 Samuɛli 23:2) Tusia te ba mɔ̀ ka faransem Traduction du Monde Nouveau sɔɔ, ba Yehofan yĩsiru wesia ten ayeru sɔɔ, nge mɛ ya raa yorua yori gbiiki sɔɔ nɔn 7 000 n saka. Yen weenasia tia ba sɔ̃ɔsimɔ foto tem tem gia sɔɔ. (Womu 83:18 NW) Bibeli ye, ya sãawa wɔ̃ɔ dabi dabinun kason wɛ̃ɛ nɔɔ, ya garibu do, ma ya Gusunɔn bwisikunu tusia dee dee. A tusia te mɔ ka wunɛn barum? A ǹ te mɔ? Mɛ n kua mɛ n dera, sa nun kanamɔ a de kpa Yehofan Garin garibu bu ko wunɛn dɔɔnɛ baadomma.—Yosue 1:8; Womu 1:2, 3.

• Mban sɔ̃na tɔn ba raa Bibelin tusia kpaarun bukata mɔ?

• Kookoo gee sirà n weenɛ wi u kĩ u Gusunɔn kĩru gia u n mɔ?