Swaf taun ḇe taun kwar, Saksi-Saksi Yahwe sya sepake, sifrur, ma sirwas terjemahan Refo nabore. Ḇape, nggokara fandun fa nggofrur terjemahan ḇebabo, na ḇefnoḇek snonggaku sya sfarkor fa ”sifawi ro ḇaḇenapnapesya”, imnis Allah imarisen faro snonggaku sya kam. (1 Timotius 2:3, 4) Inja, ro taun 1950, nggofrur Refo Terjemahan Dunia Baru ro wos ḇepyan syadi, ḇar ḇe ḇar na. Refo ine sifarwe ma sifrur na fa namnis kaku nasyadi ro wos ri 160.

Sifandun Refo ḇepyan fa sifawi na. Wos na nfadadwer ker, ma terjemahan Refo ḇebor na sepake wos ḇekwar inja samswen fa sifawi mnis na. Osower ido, sisrow manuskrip-manuskrip ḇekwar na ḇemnis kaku inja wos Ibrani, Aram, ma Yunani sepake na ro Refo insa sifawi pyum na.

Sifandun terjemahan ḇefadwer Allah Wos Ḇyena ḇa. Penerjemah Refo sya sipok fa sfadwer Allah fas-fas Ḇyena; fandun fa siso pyum fas-fas ḇekaku ḇyena. Ḇape, terjemahan Refo ḇebor na sfas Yahwe snonsnon Ḇyeja ḇa.

Sifandun Refo ḇeḇuk sanandik faro ḇena kakara ro Refo ya. (2 Samuel 23:2) Ro Terjemahan Dunia Baru sfas kaḇer Yahwe snonsnon Ḇyedi imnis kuker manuskrip Refo ḇekwar ḇebuk snonsnon ani indokada kali ri 7000. Imnis ra ḇefasnai ro Gambar ḇero sop ine. (Mazmur 83:18) Ro taun ḇe taun bon sismai ro sasewar sena, Refo ine ipyan fa siwasya ma nfasnaiḇair Allah swaruser Ḇyena kuker pyum. Nwa Refo Terjemahan Dunia Baru ke roḇa, nggomarisen nggodif Au fa wawasya Yahwe Wos Ḇyedine ro ras ḇe ras.​—Yosua 1:8; Mazmur 1:2, 3.

• Rosai ḇefnai fa nggofandun terjemahan Refo ḇebabo?

• Rosai snonggaku ḇemarisen ḇefarkor Allah marisen Ḇyena sya sifrur ro ras ḇe ras?