San caman kɔnɔ, Jehova Seerew ye baara kɛ ni Bibulu suguya caman ye, k’a suguya caman bɔ ani ka olu jɛnsɛn. O kɔ an y’a ye ko nafa b’a la ka Bibulu bayɛlɛmalen kura dɔ bɔ, walasa ka bɛɛ kelen-kelen dɛmɛ u ka “tiɲɛ dɔn” i ko Ala b’a fɛ cogo min na. (1 Timote 2:3, 4) O de la san 1950, Traduction du monde nouveau angilɛkan na bɔli daminɛna dɔɔnin-dɔɔnin. O Bibulu bayɛlɛmana ni kantigiya ani tiɲɛ ye, ni kuma cogo nɔgɔnma ye kan 130 ni kɔ la.

Bibulu don min faamuyali ka nɔgɔn. Kanw bɛ yɛlɛma, o kama Bibulu bayɛlɛmalen dɔw kɔnɔna kumaw dɔw dɔnnen tɛ kosɛbɛ, walima baara tɛ kɛ ni u ye bilen, ani u faamuyali ka gɛlɛn. O la, Bibulu sɛbɛn kɔrɔw sɔrɔliw, minnu tun ye tiɲɛ ye ani minnu tun ka surun Bibulu sɛbɛn fɔlɔ la, o kɛra sababu ye faamuyali ɲuman sɔrɔ la Heburu kan, Aramɛyen kan ani Gɛrɛki kan na, Bibulu sɛbɛnna kan minnu na.

Bayɛlɛmali don min bɛ bɛn ni Ala ka cikanw ye tigitigi. Bibulu bayɛlɛmali kɛlaw tun ka kan ka tugu Bibulu sɛbɛn fɔlɔ kɔ, walasa u ka bayɛlɛmali ni Ala ka cikanw ka taa ni ɲɔgɔn ye, o kama u tun man kan ka o baara kɛ cogo min ye u ja. O n’a ta bɛɛ, Bibulu Senuma caman kɔnɔ, Ala tɔgɔ Jehova tɛ sɔrɔ yen.

Bibulu don min bɛ bonya da Ala tɔgɔ kan. (2 Samuɛl 23:2) Traduction du monde nouveau kɔnɔ, Ala tɔgɔ seginna ka sɛbɛn yɔrɔ 7000 la ka kɛɲɛ ni o tun bɛ Bibulu sɛbɛn kɔrɔw kɔnɔ cogo min na, i n’a fɔ an bɛ o ye duguma ja la. (Zaburu 83:19, BS 1961) Ka kɛɲɛ ni san caman ɲininiw ye, o Bibulu bɛ Ala ka miirinaw jira k’a jɛya ani a kalanni ka nɔgɔn. Ni Traduction du monde nouveau bɛ aw ka kan na walima n’a tɛ aw ka kan na, an bɛ aw jija aw ka Jehova ka Kuma kalan don o don k’o kɛ aw ka delinanko ye.—Josue 1:8; Zaburu 1:2, 3.

• Mun na an mago tun bɛ Bibulu bayɛlɛmalen kura la?

• Delinanko jumɛn bɛ kɛ sababu ye an bɛ Ala sago dɔn?