Sirikokon poko, na’na pyime moro Tamusi Karetary mero’san aku’i nikapyi, nekambodyi pyime roten auranano ta. Irombo te na’na kynenen asery me tera moro auranano yry o’win o’win pai kapanotoko me « iru’pyn me moro iporono oka ukutyry poko », Tamusi i’se iwairy wara ro (1 Timoteus 2:3, 4). Iwara te 1950 ta, moro Asery Tamusi karetary u’mapo tykase man angeresi auran ta. Tamyikapore, iru’pyn me, ero Tamusi karetary tymero man, erome’nokon auranary wara, 160 auranano ta.

O’win Tamusi karetary wairy man, sawone tykutymy’me. O’win auranano kynepetakamanon morokon siriko wopyrykon wara ro, morokon Tamusi karetary mero’san penatonokon auranano ta, tyjanare man ukutome. Moro noro kapyn, morokon penato’san karetakon mero’san topoje tywaije man iru’pyn me ne’katu rapa, tyse waty morokon irokon nero mero’san wyino, moro wa ro tukupo po ne’katu rapa man, moro simosu auran ta, arapu auran ta, griek auran ta enapa.

O’win tamyikaporen auranano yry’po Tamusi auran merotome. Morokon Tamusi nimeropo’san auranano, enurimary kapyn tywaije man mo’karon imeronamon nimero’san wyinombo. Se’me te pyime morokon Tamusi karetary tanokon mero’san, moro kurano Tamusi ety Jehowah anaku’pa man.

O’win Tamusi karetary moko Tymeroponenymbo wa kurano yjan (2 Samuel 23:2). Moro Asery Tamusi karetary u’mapo ta moro kurano Tamusi ety tymero rapa man, 7 000 poto, moro koromone imeropombo wara moro po’po enepo’po wara (Ware 83:18). Sirikokon poko imengapo ke, ero Tamusi karetary tykase man awa’ponano maro erupatome, iru’pyn me enapa kynenepojan one wara Tamusi wonumengary erokon poko. Ero asery auranano ta ikapy’po a’ta ajekosaine, amy waty a’ta ajaurankon ta, na’na apanatomaton ero Jehowah Auran erupatome o’waine kurita wararo (Josua 1:8 ; Ware 1:2, 3).

• Otonome ko o’win asery me Tamusi Karetary u’mapo wairy nairy ?

• Otypan omenano ko moro Tamusi nisanory ukupopojan ?