Jehovah Tehte Hna nih kum tampi chung Baibal a phunphun kha an rak hman, an rak nam i an rak chuah. Mi vialte nih a hmaanmi “biatak” hngal hna seh ti kha Pathian nih a duh, mah biatak kha mi nih ṭha deuh in an hngalh khawh nakhnga bawmh awkah Baibal thar pakhat leh in chuah a hau ti kha an rak hmuh. (1 Timote 2:3, 4) Cucaah 1950 thawk in, chan thar holh in lehmi Vawlei Thar Lehnak Baibal a cheubang kha an rak chuah. Mah Baibal kha atu ah holh phun 130 leng in a hmaan ning tein an leh cang.

Hngalhthiam a fawimi Baibal a herh. Caan a liam bantukin holh zong aa thleng ve, mah lengah Baibal tampi ah a fiang lomi le chan nih a kaltak cangmi biafang tampi a um, cucaah Baibal cu hngalhthiam a har. A hmaan deuhmi le a hramthawk Baibal he aa naih deuhmi, kut in ṭialmi Baibal kha an hmuh cang, mah Baibal thawng in Hebru, Aramaic le Grik Baibal ah hmanmi biafang kha ṭha deuh in an hngalh khawh.

Pathian Bia a hmaan ning tein lehmi Baibal pakhat a herh. Baibal lettu pawl nih Pathian bia kha remh canah a hramthawk Baibal ning in a hmaan ning tein an leh awk a si. Asinain Baibal tampi ah cun, Pathian min Jehovah kha an telh lo.

Pathian thang a ṭhattermi Baibal pakhat a herh. (2 Samuel 23:2) A tanglei i langhtermi, a hlun bikmi kut in ṭialmi Baibal ah Jehovah min kha 7000 leng aa ṭial, mah ning in Vawlei Thar Lehnak Baibal zong ah an ṭial ve. (Salm 83:18) Kum tampi chung Baibal biatak kha teima tein an rak kawl caah mah Baibal ah Pathian ruahnak kha fiang tein an ṭial khawh, cucaah mah Baibal cu rel a nuam tuk. Nan holh in chuahmi Vawlei Thar Lehnak Baibal na ngeih lo hmanh ah, na ngeihmi Baibal kha nifate rel lengmang awkah kan in forh.—Joshua 1:8; Salm 1:2, 3.

• Vawlei thar lehnak Baibal chuah awkah zeicah bia kan khiah?

• Pathian duhnak hngalh a duhmi paoh nih zeidah nifate tuah a herh?