Mfe pii a abɛsen kɔ no, Jehovah Adasefo dze Bible nkyerɛase ahorow bi dzii dwuma, wotsintsimii na wɔkyekyɛɛ bi so. Naaso yebohunii dɛ no ho hia dɛ yɛyɛ Bible nkyerɛase fofor a odzi mu a ɔbɔboa nyimpa yie ma woeesũa “nokwar no no ho nyimdzee” a odzi mu, iyi nye Nyankopɔn n’apɛdze ma nyimpa nyina. (1 Timothy 2:3, 4) Ntsi wɔ 1950 no, yɛhyɛɛ ase yii New World Translation a ne kenkan nnyɛ dzen no n’afã ahorow bi edzi wɔ Borɔfo kasa mu. Wɔakyerɛ dɛm Bible nkyerɛase yi ase pɛpɛɛpɛr akɔ kasa ahorow bɔbor 130 mu.

Nna Bible nkyerɛase a ne ntseasee nnyɛ dzen ho ebehia. Ofi ber to ber no, kasa ahorow sesã, naaso Bible nkyerɛase ahorow pii dze nkasafua a ne ntseasee yɛ dzen na bi so wɔ hɔ a wɔnnda ho nnkã bio dzi dwuma. Afei so, woehu tsetse nsaano nkyerɛwee ahorow a no mu nsɛm no yɛ pɛpɛɛpɛr na ɔnye Bible a wodzii kan kyerɛwee no hyia, na iyi aboa ma wɔatse Hebrew, Aramaic nye Greek kasa ahorow a wɔdze kyerɛɛw Bible no ase yie.

Nna nkyerɛase a ɔnye Nyankopɔn asɛm hyia no ho ebehia. Dɛ nkyɛ Bible asekyerɛfo bɛsesã nsɛm a Nyankopɔn fi no sunsum mu akyerɛw no, nkyɛ ɔsɛ dɛ wɔkyerɛ ase ma ɔnye dza wodzii kan kyerɛwee no hyia pɛpɛɛpɛr mbom. Naaso, wɔ Bible nkyerɛase pii mu no, Nyankopɔn ne dzin Jehovah no nnyi Kyerɛw Krɔnkrɔn no mu.

Nna Bible nkyerɛase a ɔdze enyimnyam ma ne Kyerɛwfo no ho ebehia. (2 Samuel 23:2) Wɔ Bible nsaano nkyerɛwee a wɔakyɛr sen biara no mu no, nna Jehovah ne dzin no pue wɔ mu bɛyɛ mpɛn 7,000, na New World Translation Bible no asan dze dzin no ahyehyɛ beebiara a nna ɔwɔ, dɛ mbrɛ yehu ho nhwɛdo wɔ ase ha no. (Ndwom 83:18) Dza woefi mfe pii a wɔdze nsi ayɛ nhwehwɛmu no mu aba nye dɛ, wɔama Bible yi ne kenkan ayɛ enyikã, osiandɛ ɔda Nyankopɔn adwen edzi pɛpɛɛpɛr. Ntsi dɛ New World Translation no bi wɔ wo kasaa mu o, dɛ ibi nnyi mu o, yɛhyɛ wo nkuran dɛ yɛ nhyehyɛɛ pa fa kenkan Jehovah Asɛm no dabiara.​—Joshua 1:8; Ndwom 1:2, 3.

• Ebɛnadze ntsi na yesii gyinae dɛ Bible nkyerɛase fofor ho hia?

• Ebɛnadze na ɔsɛ dɛ obiara a ɔpɛ dɛ osũa Nyankopɔn apɛdze no yɛ no dabiara?