Kwəlan damaa yee mu, ku kalan gɛ a Biblə huwu tamaa, Kuɔ di ɲaakwɛlɛ nua diɛ. Yili pulu, ku maakpaan ə hee Biblə hu woo pɛɛn ninɛ ɓa, ə gɛ ku kpɔnmaa tɛɛ nua pɔ di pɛli “ di teɲa kɔlɔn ” yɛ pələi Yálá kaa la bɔ (Timɔtə dɔlɔɔ 2:3, 4). Yili ɓə gɛ, gwəlan 1950, ku Biblə hu woo pɛɛn angilɛɛ woo hu. Bibləi tii laa ɓaa Traduction du monde nouveau, ɉu woo pɛɛin a teɲa da təlimo laa. Mo laa nɛɛi, ə lɛɛ gaa híín woo 120 da da hu.

Gaa a Biblə yii ɲaakaa laa nɛɛ. Híín wooɠaa ɓo pələ maa a kɛ hwalən ɉii, Biblə huwu tamaa kaa laa, wooɠaa kaa ɉu ɲaakaa laa walaa yiihu nua diɛ. Biblə toloo yii di bɛɛn di yee ŋa hebulu woo hu, gɛlɛkə woo hu, ə lɛɛ alameɛn woo hu, ə kpɔnmaa tɛɛ ku pɔ ku ɉíín woo haaɓai tii ɲaakaa a nɛlɛɛ Biblə hu woo pɛɛn mɛni ɓa.

Gaa a Biblə yii ɉu woo pɛɛn a təlimo laa. Maanɛɛ Biblə hu woo pɛɛn nua di lɛɛ a di təlimoɔ Biblə toloo wɔlɔ di bɛɛn di yee ŋa ma, yai ɉu woo ə həɠə Yálá yəi. Kɛlɛɛ Yálá laa leelee yii da kɛ ma Zehova, ho Biblə tamaa hu.

Gaa a Biblə yii a Yálá laa tɛ. (Samiyɛli veelɛnaa 23:2, TMN.) Ɓɛiɠaa Zehova laa kaa laa Biblə yii di bɛɛn di yee ŋa ɉu, naaɠaa lɔ ɓə Zehova laa tii kaa laa Traduction du monde nouveau hu gee mɛi 7 000 da da, yɛ pələi votoi ŋɛi kaa nɛi la ɉɛɓɛ kɔwɔla (Somə 83:18, TMN). Di kóló kɛ kwəlan damaa yee mu kpɔ a nwala-walaa, ə gɛ di Yálá ŋɔ kiliŋahiɛ pɛɛn a nɛlɛɛ Biblə tii hu, nua da kɛi mo diɛ ɲaakaa, di kwəi yɛ nɛɛ. Ə ma kɛ Traduction du monde nouveau ho ə́ lawoo hu, ku kaa ə́ hwaŋalɔi Yálá lawoo ɓo mɛni ɓa holo kəlee. — Zosue 1:8, TMN ; Somə 1:2, 3, TMN.

• Lə mɛni ɓa ku Biblə hu woo pɛɛn ?

• Lə ɓə nu a pɛli gɛi holo tɛi-tɛi yee mu yɛ pɛli Yálá liiɓa kɔlɔn ɉii ?