Mɨixa wiitari, Jehová Niukíeya temɨkuxaata hiipame Biblia tepanayeʼɨɨkekai metá tepenayenenetɨwakai, tepekaterɨwakai tsiere teuteri tepɨwatahuritɨwakai. ʼAriké tepɨtehetimá, Biblia peuyewekakai hekwamekɨ ʼutɨarietɨ teuteri matsi «ʼaixɨ memɨteheitiʼenietɨkɨnekɨ tita mɨtiyuri», kepaitsɨ Yuútsi mɨkɨ pɨreuyehɨwá meyunaime teuteri waheetsíe (1 Timoteo 2:3, 4). ʼAyumieme 1950, tepɨteʼukatsutɨa ʼetsiwa Biblia teʼanayenenetɨwatɨ Ingleskɨ, hiikɨ mɨtiuniuwa hepaɨ, titewatɨ la Traducción del Nuevo Mundo, yeme ʼaixɨ pɨreukuʼutɨarie metá tixaɨ pɨkatiupatsie 130 niuki ʼanutihukametsíe panayenetɨarie.

Peuyewekakai Biblia heyutiʼenierietɨyeikatɨ. Tuukaari manuyemietsíe niukite pɨyuyepatarɨme, ʼayumieme hiipatɨ Biblia pɨkaheyutiʼenierietɨkɨka, nutsɨ mana mayehukɨ ʼɨɨkitɨarikate ʼawietsietɨkaitɨ́. Tsiere, hiipatɨ pukaxeiyaarie ʼutɨarikate matɨari mɨreukuʼuxakai hepaɨ ʼaneneetɨ, ʼaixɨ reukuʼutɨkaitɨ́, ʼaixɨ matsi reyutiʼenierietɨyeikame, hebreokɨ, arameo metá griegokɨ.

Yuútsi Niukieyatsíe peuyewekakai ʼutɨarika yuri raʼɨɨkitatɨ. Keane Yuútsi Niukíeya yuniukikɨ memutiʼutɨwa, mepɨkayɨwawe memɨtepatá tita mɨrayemié ʼutɨarikatetsíe; mepɨteʼikuʼutɨwani matɨari mɨreukuʼuxakai hepaɨ. Yatɨtɨ, hiipame Bibliatsíe pɨkahayemié Yuútsi kemɨtitewá, Jehová.

Peuyewekakai xewitɨ Biblia ʼaixɨ mɨtixeiyariekakɨ keane Mɨtipinieya. (2 Samuel 23:2). Traducción del Nuevo Mundo tsíe, mana Jehová pakaʼutɨarie ʼetsiwatɨkakɨ 7,000 paɨmexɨa, meripaitɨ ʼutɨarikate mɨreukuʼuxakaitsíe hepaɨ, kwinatɨrieka ʼɨɨkiya ʼeena mɨkamatsíe hepaɨ (Salmo 83:18). Waɨká wiitaritsíe pɨtiutiwawie ʼaixɨ mɨtiʼutɨarienikɨ ʼikɨ Biblia, ʼaixɨ yeme pɨtiuyuterɨwa Yuútsi kemɨtikuʼeriwa mana makaʼuxakɨ. Xɨka ʼekɨ peheixeiyani ʼaniukikɨ nutsɨ waikɨ, tematsiʼinié Yuútsi Niukíeya pemakaterɨwanikɨ naime tuukaaritsíe (Josué 1:8; Salmo 1:2, 3).

• ¿Títakɨ reuyewekakai xewitɨ Biblia heyutiʼenierietɨyeikame?

• ¿Ketiuyuriwe xewitɨ xɨka reumaimɨkɨni tita Yuútsi mɨreuyehɨwá?