Kuaʼa̱ vá kuia̱, na̱ testigo Jeová ni̱ tavá ná ta ni̱ ka̱chúun na, ta ni̱ na̱jasá ná kuaʼa̱ nu̱u Tu̱ʼun Ndio̱s. Jo, tá ni̱ ya̱ʼa kuia̱ já ni̱ ku̱ndaa̱ ini na ña̱ kánian tavá ná iin Tu̱ʼun Ndio̱s ña̱ kuu chindeé na̱yivi já ná ‘kundaa̱ ini na ña̱ ndaa̱ saʼa̱ mií Ndio̱sʼ, jáchi̱ ña̱yóʼo kía̱n kúni̱ si ña̱ ná kundaa̱ ini ndijaá táʼa̱n na̱yivi (1 Timoteo 2:3, 4). Saʼa̱ ña̱yóʼo, kuia̱ 1950 jaá ni̱ ka̱sáʼá ná tavá na̱ java taʼndá Tu̱ʼun Ndio̱s nuu̱ túʼún inglés tátu̱ʼun ki̱ʼa káʼa̱n na̱ kivi̱ víti ña̱ naní: Traducción del Nuevo Mundo, ta ni̱ na̱taa na ña̱yóʼo nuu yáʼa ka̱ 120 yúʼu̱.

Ni̱ si̱ síniñúʼú na̱yivi iin Tu̱ʼun Ndio̱s ña̱ kuu kundaa̱ ini na. Tá yáʼa tiempo nája̱ma va tu̱ʼun káʼa̱n na̱yivi, ta nuu̱ kuaʼa̱ Tu̱ʼun Ndio̱s va̱si tu̱ʼun ña̱ ko̱ káʼa̱n ka̱ na̱yivi kivi̱ víti, jáchi̱ tu̱ndóʼó vá já kundaa̱ ini na ña̱. Ta jaá ni si̱ ni̱ nda̱níʼi̱ ná java ka̱ tutu ña̱ ni̱ taa na tá si̱naʼá ña̱ káʼa̱n tátu̱ʼun ki̱ʼa káʼa̱n Tutu ii̱ ña̱ ni̱ taa na nda̱ mií saʼa̱, ta ña̱yóʼo chíndeéán na̱yivi já kúu kúndaa̱ ini na tu̱ʼun hebreo, arameo xíʼín tu̱ʼun griego ña̱ va̱si nuu̱ Tu̱ʼun Ndio̱s.

Ni̱ si̱ síniñúʼú na̱yivi iin Tu̱ʼun Ndio̱s ña̱ káʼa̱n ña̱ ndaa̱. Na̱yivi na̱ taa Tu̱ʼun Ndio̱s o̱kúu taa na ña̱ nákani ini miíná, ta ni o̱kúu najama na ña̱ va̱si nuu̱án. Jo, nu̱ú kuaʼa̱ Tutu ii̱ ko̱ vási ka̱ kivi̱ mií Ndio̱s, Jeová.

Ni̱ si̱ síniñúʼú ná iin Tu̱ʼun Ndio̱s ña̱ kéekáʼno Ndio̱s, Ta ni̱ kee ña̱ ni̱ taa na ña̱ (2 Samuel 23:2). Nuu̱ Tu̱ʼun Ndio̱s ña̱ naní: Traducción del Nuevo Mundo, tátu̱ʼun usa̱ mil ká taʼndá ni̱ na̱taa na kivi̱ Jeová Ndio̱s nu̱ú va̱sian nda̱ mií saʼa̱ nuu̱ tutu ña̱ ni̱ taa na tá si̱naʼá, tátu̱ʼun ki̱ʼa náʼa̱ mií saʼa̱ página yóʼo (Salmo 83:18). Ta kújii̱ ini yó káʼvi yó iin Tu̱ʼun Ndio̱s ña̱ va̱árá kuaʼa̱ kuia̱ ni̱ ya̱ʼa já ni̱ taa na ña̱ jo, káʼa̱n kasíán ña̱ nákani ini Ndio̱s. Ta va̱árá ko̱ó Tu̱ʼun Ndio̱s ña̱ naní: Traducción del Nuevo Mundo, nuu̱ ní jo, ndini kivi̱ kaʼvi ní Tu̱ʼun Jeová Ndio̱s (Josué 1:8; Salmo 1:2, 3).

• ¿Ndiva̱ʼa ni̱ kanian ni̱ tavá nduʼu̱ iin Tu̱ʼun Ndio̱s ña̱ káʼa̱n tátu̱ʼun káʼa̱n yó kivi̱ víti?

• Na̱ kúni̱ kundaa̱ ini ña̱ kúni̱ Ndio̱s, ¿ndíki̱án kánian kee na ndini kivi̱?