Kwa myaka mingĩ, Ngũsĩ sya Yeova nĩsyatũmĩaa Mbivilia ingĩ vamwe na kũikyavĩthya na kũiaa. Ĩndĩ, nĩtwoonie vata wa kumĩthya Mbivilia ya Tafsiri ya Ulimwengu Mpya nĩ kana ĩtetheesye andũ nesanga “mamanye ũla w’o,” nũndũ kũu nĩ kw’o kwenda kwa Ngai kwelekela kĩla mũndũ. (1 Timotheo 2:3, 4) Kwoou mwakanĩ wa 1950, nĩtwambĩĩe kumĩthya ilungu sya Mbivilia ya Tafsiri ya Ulimwengu Mpya, ĩla nĩ ya kĩthyomo kya matukũ aa. Mbivilia ĩno yĩalyũlĩtwe kwa ũĩkĩĩku na kwa ũw’o nthĩnĩ wa ithyomo mbee wa 130.

Vaĩ vata wa Mbivilia ĩkũeleeka kwa nzĩa yĩ laisi. Ĩtina wa ĩvinda ithyomo nialyũkaa, na Mbivilia mbingĩ itũmĩĩte ndeto syĩ vinya kũeleeka kana itatũmĩawa ũmũnthĩ. Ĩngĩ, mavuku ma tene ma Mbivilia ala me na ũw’o mbeange wa ala angĩ na mathengeee mũnango mavuku ma Mbivilia ala maĩ ma mbee vyũ nĩmonekete, na ũu nũtumĩte ithyomo sya Kĩevelania, Kĩalamu, na Kĩkiliki ila Mbivilia yaandĩkiwe nasyo ieleeka nesa.

Vaĩ vata wa Mbivilia ĩatĩĩe ndeto ya Ngai nesa. Vandũ va kũvĩndũa ndeto ya Ngai mbeveee, aalyũli ma Mbivilia maĩlĩte kũmĩalyũla kwa ũĩkĩĩku maatĩĩe mavuku ala ma tene ma Mbivilia. Ĩndĩ Mbivilia mbingĩ iitũmĩĩte syĩtwa ya Ngai, Yeova, nthĩnĩ wa Maandĩko asu Matheu.

Vaĩ vata wa kwĩthĩwa na Mbivilia ĩkũkumya Mũandĩkĩthya wayo. (2 Samueli 23:2) Nthĩnĩ wa Tafsiri ya Ulimwengu Mpya, syĩtwa ya Yeova nĩyĩtũngĩĩtwe mbee wa mavinda 7,000 vala yĩthĩawa nthĩnĩ wa mavuku ala ma tene ma Mbivilia, o tondũ ngelekany’o ĩno yĩ vaa ĩtheo yonanĩtye. (Savuli 83:18) Nĩ ũtanu kũsoma Mbivilia ĩĩ nũndũ nĩyĩkĩwe ũkunĩkĩli wa myaka mingĩ na nĩyonanĩtye nesa mesilya ma Ngai. Wĩthĩwe wĩ na Mbivilia ya Tafsiri ya Ulimwengu Mpya kwa kĩthyomo kyaku kana ndwĩ nayo, twĩkwĩkĩa vinya wĩthĩwe na kĩmanyĩo kĩseo kya kũsoma Ndeto ya Yeova kĩla mũthenya.​—Yosua 1:8; Savuli 1:2, 3.

• Nĩkĩ twoonie ve vata wa kũalyũla Mbivilia?

• Ũla ũkwenda kũmanya kwenda kwa Ngai aĩlĩte kwĩthĩwa na kĩmanyĩo kĩva kĩseo kya kĩla mũthenya?