Da ki phew snem, ki Nongsakhi U Jehobah ki la pyndonkam, ki la shon bad ki la sam ïa ki Baibl bapher bapher. Hynrei ngi ïohi ba la donkam ban pynmih ïa ka jingpynkyllaktien bathymmai ban ïarap ïa ki briew ban ïoh “jingtip ia ka jingshisha.” Kane ka dei ka mon jong U Blei na ka bynta iwei pa iwei. (1 Timothi 2:3, 4) Kumta, ha u snem 1950 ngi la sdang ban pynmih shibynta jong ka Baibl ha ki jait ktien ba ju kren ha ka juk mynta, ka Jingpynkyllaktien Pyrthei Bathymmai. Ïa kane ka Baibl la pynkylla ktien thik pa thik ha palat 130 tylli ki jait ktien bad ki long kiba lah ban shaniah.

La donkam ïa ka Baibl kaba suk ban sngewthuh. Ki jait ktien ki kylla na ka por sha ka por, bad ha bun na ki jingpynkyllaktien ki don ki kyntien ki bym ju pyndonkam shuh bad kiba eh ban sngewthuh. Shuh shuh, la shem ïa ki jingthoh kiba la rim bha, kiba kham shai, kiba long kum ki jingthoh banyngkong. Lyngba kane, la lah ban kham sngewthuh shai ïa ki jingthoh ha ka ktien Hebru, Aramaik bad Krik.

La donkam ïa ka jingpynkyllaktien kaba ïaineh ha ka Ktien U Blei. Ha ka jaka ban leh katba mon ïa ki jingthoh ba la pyrsad mynsiem da U Blei, ki nongpynkyllaktien ki dei ban bud thik pa thik ïa ki jingthoh tynrai. Hynrei, ha bun na ki Baibl la weng noh ïa ka kyrteng jong U Blei, U Jehobah.

La donkam ïa ka Baibl kaba ai burom ïa la U Nongthoh. (2 Samuel 23:2) Ha ka Jingpynkyllaktien Pyrthei Bathymmai ïa ka kyrteng Jehobah la buh biang thik kumba 7,000 sien, kumba la shem ha ki jingthoh tynrai ba la pyni harum. (Salm 83:18) Ka jingwadbniah kaba da ki snem ka la pynïoh ïa ka Baibl kaba sngewtynnad ban pule namarba ka batai shai ïa ka jingmut jong U Blei. La phi don ne phim don ïa ka Jingpynkyllaktien Pyrthei Bathymmai ha ka ktien jong phi, ngi pynshlur ïa phi ban pule ïa ka ktien jong U Jehobah man la ka sngi.​—Joshua 1:8; Salm 1:2, 3.

• Balei la donkam ïa ka jingpynkyllaktien bathymmai ïa ka Baibl?

• Ban tip ïa ka mon jong U Blei, aïu dei ban leh man la ka sngi?