Fɔs fɔs tɛm, Jiova Witnɛs dɛn bin de yuz, print, ɛn sheb difrɛn difrɛn Baybul dɛn. Bɔt wi kam si se wi fɔ translet di Baybul so dat wi go ɛp pipul dɛn fɔ “no wetin tru.” Ɛn na dat Gɔd want. (Fɔs Lɛta To Timoti 2:3, 4) So insay 1950, wi bigin fɔ print di New World Translation Baybul af-af. Wi dɔn translet dis Baybul insay pas 130 langwej dɛn so.

Wi nid Baybul we nɔ at fɔ ɔndastand. Langwej dɛn de chenj as tɛm de go, ɛn plɛnti Baybul dɛn gɛt wɔd dɛn we at fɔ ɔndastand ɛn we pipul dɛn nɔ de yuz igen. Ɛn sɔm pipul dɛn dɔn fɛn dɛn fɔs fɔs tɛm pepa dɛn we dɛn rayt di Baybul pan. Dɛn pepa ya gɛt di tru tin dɛn we bin de na di Baybul ɛn dɛn dɔn mek wi dɔn ɔndastand gud gud wan di langwej dɛn we dɛn bin yuz fɔ rayt di Baybul. Dɛn langwej ya na Ibru, Arameik ɛn Grik.

Wi nid Baybul we dɛn translet kɔrɛkt wan. Di wan dɛn we de translet di Baybul nɔ fɔ de chenj wetin Gɔd tɔk, bɔt dɛn fɔ rayt am lɛk aw i de. Bɔt bɔku Baybul dɛn nɔ gɛt Gɔd in nem.

Wi nid Baybul we de tɔk bɔt di pɔsin we rayt am. (Sɛkɛn Lɛta To Timoti 3:16) Insay di New World Translation, Gɔd in nem de de lɛk 7,000 tɛm so. Na so i bin de we dɛn bin rayt di Baybul fɔs. Na af pat pan wan fɔs tɛm Baybul de dɔŋ di pej so. (Sam 83:18, NW) Di wan dɛn we translet di New World Translation, bin stɔdi gud gud wan fɔ translet am. So, wi de ɛnjɔy fɔ rid am ɛn i de tɛl wi klia wan wetin Gɔd want. Wi want lɛ yu go de rid di Baybul ɛvride ilɛksɛf yu nɔ gɛt di New World Translation insay yu langwej.—Sam 1:2, 3; 119:97.

• Wetin mek wi translet di Baybul?

• Wetin yu fɔ de du ɛvride fɔ sho se yu want fɔ lan bɔt Gɔd?