DILONGI 4
Samu na yinki beto bimisaka Mbangudulu ya Yinza ya Yimpa?
Congo (Kinshasa)
Rwanda
Kitini ya masonukua ya Symmaque yina kela na nkumbu ya Nzambi, na Nkunga 69:31, yina sonamaka na siekle ya tatu to ya yiya ya Ntangu ya Beto
Bamvula mingi zingilaka, Bambangi ya Yehova vuandaka sadila, kubimisa na masini mpe kukabula bambangudulu ya Biblia mutindu na mutindu. Kasi beto kuizaka mona ti beto fueti bimisa mbangudulu mosi ya Biblia yina kesadisa bantu babaka ‘nzayilu ya sikisiki ya kedika,’ mutindu Nzambi mezodila samu na muntu nionso. (1 Timoteo 2:3, 4) Yau yina na mvula ya 1950, beto bandaka kubimisa bitini ya Biblia Mbangudulu ya Yinza ya yimpa, na Kingelesi ya ntubulu ya bilumbu ya beto. Biblia yango mebangulua na kukuikama mpe busikisiki na bandinga kuluta 130.
Yau lombamaka kubimisa Biblia mosi na ntubulu ya pete. Bandinga bantu ketubaka kekuizaka suasakana na manima ya bilumbu, mpe bambangudulu mingi ya Biblia kesadilaka ntubulu ya ntama, to yina ketomaka bimisa mbotembote ve bangindu. Katula yau, bamaniskri ya ntama ya Biblia yina fuanana mpenza na mikanda ya ebandeli mpe yina basonikaka mua fioti na manima ya yina ya ebandeli yakuizaka monana. Yau sadisaka bantu bazaba mingi kuluta ndinga ya Ebreo, Arameye mpe ya Greki yina basonikinaka na yau Biblia na ebandeli.
Yau lombamaka mbangudulu mosi yina kele na nguizani mpenza na Mpova ya Nzambi. Na kisika ya kubuela to kukatula mambu yankaka na masonukua ya Nzambi, bambangudi ya Biblia fueti bimisa nde na kukuikama nionso bangindu ya masonukua ya ebandeli. Nzokande, na bambangudulu mingi ya Masonukua ya nlongo, nkumbu ya Nzambi, Yehova, kele ve.
Yalombamaka kubimisa Biblia mosi yina kepesa Mfumu na yau lukumu. (2 Samuele 23:2) Biblia Mbangudulu ya Yinza ya Yimpa mevutula nkumbu Yehova mbala kana 7000 na bisika yina yavuandaka na bamaniskri ya ntama ya Biblia, mutindu kifuani yayi na yinsi memonisa yau. (Nkunga 83:18, NWT) Bambangudi ya Biblia Mbangudulu ya Yinza ya Yimpa basosasosaka na mpinda bamvula mingi samu na kubimisa mbangudulu yina keyangidikaka na kutanga mpe kebimisaka mbotembote bangindu ya Nzambi. Yau vuanda nge kele na Biblia Mbangudulu ya Yinza ya Yimpa na ndinga nge ketubaka to ve, beto mekindisa nge nge tangaka Mpova ya Yehova kilumbu na kilumbu.—Yozue 1:8; Nkunga 1:2, 3.
-
Samu na yinki beto monaka ti beto fueti bimisa mbangudulu mosi ya yimpa ya Biblia?
-
Yinki diambu muntu kena nsatu ya kulonguka luzolo ya Nzambi fueti sala kilumbu na kilumbu?
