Tuka kolo, Mbangi za Yave besadilanga, nieteka yo kayanesa nsekola zayingi za Bibila. Kansi, twabakula vo diambote mu vaikisa nsekola yampa ya Nkand’a Nzambi muna sadisa wantu balongoka yo luaka “muna visa kia zay’e ludi,” kadi o lwalu i luzolo lwa Nzambi kwa wantu a mpila zawonso. (1 Timoteo 2:​3, 4) Ozevo, muna mvu a 1950 twayantika vaikisa tini ya Tradução do Novo Mundo tusadilanga o unu. E nsekola yayi ya Nkand’a Nzambi, yasekolwa ye ziku kiawonso mu vioka 130 ma ndinga.

Nsekola yaleboka twavwanga o mfunu. Ekolo e mvu miviokanga, e ndinga mpe soba zisobanga. Nsekola zayingi zasadila mvovo ke misadilwanga diaka ko ye miampasi mu bakula. Vana ntandu, sono yayingi yankulu isolokanga ina betela ye sono yantete ya Nkand’a Nzambi. Ediadi disadisanga mu toma bakula e Sono ya Nkand’a Nzambi yasonekenwa muna Kiyebere, Ki-aramiti ye Kingerekia.

Nsekola ina ngwizani ye diambu dia Nzambi twavwanga o mfunu. Vana fulu kia bendomona e sono yavumunwinwa kwa Nzambi, diavavanga vo asekodi basekola mawonso mena muna sono yantete ya Nkand’a Nzambi. Kansi, muna nsekola zayingi, e nkumbu a Nzambi, Yave, ke yasonama ko muna Sono Yavelela.

Nsekola ivananga nkembo kwa Yave twavuanga o mfunu. (2 Samuele 23:2) Muna nsekola ya Tradução do Novo Mundo e nkumbu a Yave yavutulwa, tezo kia nkumbu 7.000 yasonama muna sono yankulu ya Nkand’a Nzambi nze una fwaniswa kina ova yanda kisonganga. (Nkunga 83:​18) Otoma fimpulula mambu mu mvu miayingi, diasadisa alongoki mu vaikisa e nsekola yayi yambote muna tanga yo songa e ngindu za Nzambi mu mpila ya kiá. Diakala vo nsekola ya Tradução do Novo Mundo una yau muna nding’aku yovo ve, tukasakese watanganga e Diambu dia Yave lumbu yawonso.​—Yosua 1:8; Nkunga 1:​2, 3.

• Ekuma Mbangi za Yave bavaikisila nsekola yampa ya Bibila?

• Ndiona zolele zaya luzolo lwa Nzambi nkia diambu kafwete vanga lumbu yawonso?